PCB nerisassani inissiarsuarnilu nassaassaasoq ernumassutaavoq
PCB - ilaatigut plastikkimut qitulisaatitut atortagaq inuup timaanut ajoqutaasorujussuusartoq kalaallit nerisannaavini, aalisakkani, puisini, arferni nannunilu nassaassaavoq. Nerisat innuttaasut peqqissusaanut sunniuteqarnerlussinnaasut saniatigut PCB-p aamma sanaartukkani, soorlu inissiarsuarni nassaassaanera, kalaallinut ernumanaqaaq, taama avatangiisit inup timaanut sunniutaannik ilisimatusarsimasoq professor Philippe Grandjean, Syddansk Universitetetimi sulisoq oqarpoq.
- Kalaallit neqitortorujussuupput, pingaartumik imaani uumasunit, soorlu puisit neqaannik nerisaqarlutik. Ilisimaneqarpoq arferit puisillu tassaasut PCB-mik akulerujussuit. Misissuinerit siornatigut pisut takutereerpaat kalaallit qallunaanit quleriaammik annerusumik timiminni PCB-qartut. Maannalu najukkat PCB-qarnerannik tusakkat eqqarsarnartoqaqaat, Philippe Grandjean oqarpoq.
Avatangiisit PCB-mik akoqarpallaaraangata inuup timaa ima sunnertitsigisarpoq, allaat kinguaassiorsinnaassusia akornuserneqarsinnaasarluni, timip nammineq akiuussutissiorsinnaanera annikillisarluni sianiutillu sunnerneqarnerlussinnaasarlutik.
- Kingunerluutit ilaat tassaapput meeraaqqat timaasa nappaatinut akiuussinnaassusiisa qarasaasalu innarlerneqarsinnaasarnerat. Taamaammat inassutigerusuppara PCB-p atugaaneranik ukiuni tullerni Danmarkimi annikillisaanermik pilersaarutip assinganik Kalaallit Nunaanni pilersitsissasut. Suliniutissat tulleriiaarlugit suuneri qaqugulu iliuuseqarfiginissaat nalunaarsoqqissaarlugit, professori oqarpoq.
- Aamma PCB-mik akulinnik piiaaniaraanni, soorlu inissiarsuarnik ingitseriniaraanni avatangiisinut mingutsitsinngitsumik suujunnaarsitsisoqartariaqarpoq, taamaasilluni PCB soorlu puisini aalisakkanilu allaniluunniit imaanit nerisarisartakkanut pinnginniassammat, Philippe Grandjean naggasiivoq.
Philippe Grandjeanip aamma erseqqissaatigaa PCB-p annerpaartaa inuup timaani nassaassaasoq nerisanit pisartuummat, annikinnerli sanaartukkani qalipaatinit allanilu akuutissatut siornatigut atortakkanit, pisartuulluni.
