Pavia Nielsen: piniartoq namminiissaaq

Inatsisartut aqagu pingasunngornermi ataatsimiinneranni oqaluuserisat amerlanerit piniartutut inuussutissarsiuteqarnermut tunngassapput
marsip 20-at 2007 11:05

Inatsisartut aqagu pingasunngornermi ataatsimiinneranni oqaluuserisat amerlanerit piniartutut inuussutissarsiuteqarnermut tunngassapput, Inatsisartuni ilaasortat partiinit assigiinngitsuneersut siunnersuuteqarput, attaviitsullu Esmer Bergstrømip siunnersuutigaa aalisartutut piniartutullu inuussutissarsiutit inatsisitigut immikkoortinneqartariaqartut. Tamatuma saniatigut puisit amiinut tapiissutit piniartunut aningaasarsiatut atorneqartalernissaat aamma siunnersuutigalugu. Taakkununnga ukiorpassuanngortuni piniartoq Uummannameersoq, Pavia Nielsen isumaqataanngilaq.

- Aalisartutut piniartutullu inuussutissarsiuteqarneq qangarsuaniilli ataatsimoorullugit ingerlanneqartarput, piniakkat nikerarnerat aallaavigalugu, aalisakkallu periarfissaqartillugit katersorneqartarlutik- inuussutissatut. Taakkua immikkoortikkuminaattupilussuupput manna tikillugu- avissaartinneqarsinnaanngillat.

Pavia Nielsen oqarpoq silap sikup immap ukiullu nikikkiartornerani, piniakkat takkusimaarneranni sammineqartartut, piniartullu qaleralinniarnermik tapertaqartuartartut.

- Nunatsinni uumasut nikerarnerat malillugu inuusaaserput naleqquttunngorsarneqarsimavoq, sulilu taamaattuassalluni.

Puisit amiinik tunisinermut tapiissutit piniartut aningaasarsiaqartinneqalernissaannut atorneqartussianngortinneqarumanerat Pavia Nielsenip orniginartinngilaa.

- Taanna tusaannarlugu pilerinarsinnaangaluarpoq, kisianni uanga pitsaanerutippara, piniartut piniarunik. Silarsuup pissaanera illuatungaani imaannaangitsoq akimmiffiusaraluartoq, pitsaanerpaassooq peqqinnarnerpaallunilu piniartoq piniaruni, kaasafini kaanginnarlugit piniartuunersiuteqarlunilu naparliinnarnermit.

Sivisoorsuarmik silarlussinnaasarnera eqqarsaatigalugu piniartut aningaasarsiaqartinneqalersinnaanerat pissusissamisuunnginnersoq aperigatsinni akivoq:

-Piniagassanik killilersuineq pissusiviusut aallaavigalugit ingerlagaluaruni, piniartutut inuussutissarsiuteqarneq oqinnerussangaluarpoq. Pissutsit tamakku aaqqingasakkaanni Kalaallit Nunarujussuatsinni uumasut nikerarnerat aallaavigalugu aaqqissuussisoqaraluarini, piniartut inuuniarnerat oqilisinneqarsinnaagaluarpoq.