Pavia Nielsen Avannaata Kommuniani timersullammanngorpoq

Nukittuneqqusaannermi Greenland Strongest 2020-mi peqataasoq Pavia Nielsen Avannaata Kommuniani timersullammammik toqqaanermi pingaartinneqarpoq
Avannaata Kommuniani kommunalbestyrelsemi ilaasortap Sakiu Fleischerip timersullammattut nersornaat Pavia Nielsenimut tunniuppaa Assi © : Avannaata Kommunia
Allattoq Noah Mølgaard
januaarip 06-at 2021 10:00

Pavia Nielsen Avannaata Kommuniani timersullammanngorpoq.

Siorna oktoberip 24-at tikillugu Nunatsinni ilisimaneqarpianngikkaluarpoq. Tassanimi nukittuneqqusaannermi Greenland Strongest 2020-mi peqataagami oqimaassutsimini sølvinnappoq.

Corona pissutigalugu killilersuisoqaraluartoq Fitnessgl unammersuartitsivoq internet atorlugut toqqaannartumik attaveqarnikkut Ilulissaniit, Nuummiit Københavnimiillu peqataasoqarpoq.

Coronamut killilersuutit pissutigalugit kommunenit assigiinngitsuniit peqataasoqartumik unammersuartoqarsinnaanngikkallarpoq.

- Unammeqatissanniit assut tapersersorluarneqarnikuuvunga. Unamminissaq sioqqutingaatsiarlugu Ilulissanukarpunga unammissutissatsinni unammeqatissakka sungiusaqatigiartorlugit. Tamanna assut iluaqutigaara, Pavia Nielsen KNR-mut oqarpoq.

Pujortassananilu imigassamik atuinngilaq

Ukiumi timersorfiusumi 2019-mi Uummannami timersullammattut toqqagaavoq. Maannalu 2020-mi takutitsilluarnini nersornaatigissutigaa.

- Timersullammattut toqqagaaneq kajumissaataalluarpoq. Aamma arlallit kajumissaaralutik timersuutiga ingerlatiinnaqullugu oqaaseqartarput, Pavia Nielsen oqarpoq.

Kivitseriaatsimi dødløftimi 220 kilomik kivitsinera toqqaanermi Avannaata Kommuniata kisiat oqimaalutarinngilaa.

Inooriaasia aamma pujortartarani imigassamillu atuinani pisoq timersullammattut toqqagaaneranut tunngavilersuutit ilagaat.

- Imigassamik atuisuunnginnera nuannaarutigisarpara. Nammineerlunga paasinikuuara imigassamik atuisuuguma annertunerusumik angusaqarnaviarnanga. Taamaattumik imigassamik atuiunnaarpunga pujortanngisaannarlungalu, Pavia Nielsen oqarpoq.

Nunatsinni nukittuneqqusaannissamut tullermut maanna piareersarluni sungiusarpoq. Taanna unamminissaq suli ullulerneqanngilaq.