Pavep pilluaqqussutaa
Pavi Benedikt juullimi pilluaqqusinermini nunarsuarmi eqqissiviilliorfiusuni Sudan-imiit Sri Lankamut sakkut nipiliornerat ernummatigalugu oqaatigaa, ingammillu kangia qiterlermi, Irak-imi, Libanon-imi Nunamilu iluartumi eqqissiviilliorneq ajuusaarutigingaarlugu.
Allattoq Jokum Nielsen
Pavi 80-inik ukioqartoq Romami oqalugiarnermini nunarsuarmi naalakkersuinikkut siuttut isumatunissaat qinnutigaa, qinnutigalugulu qanilaarneq naapertuilluarnerlu aqqutigalugit eqqissinermik ataavartumik ujartueqqullugit.
Pavip pilluaqqussummini eqqaavaattaaq piitsuunerup, naapertuilluannginnerup sorsunnerup taarnerujussuani inuusut, soorlu aamma taagai inuit peqqissutsikkut, ilinniagaqarnikkut suliffissaqarsinnaanikkullu toqqisisimanermik ujartuigaluarlutik angusaqarsinnaatitaanngitsut.