Pave kamappoq
Pavep naalagaaffiata Vatikanip Amnesty International pisuutippaa naartuersittarnermik siuarsaasuunerarlugu – taamalu katuullit nunarsuarmi tamarmeersut Amnesty-mut aningaasanik tapersersuiunnaaqqullugit kajumissaarlugit.
Ruumami oqaluffissaarsuarmi Peters Kirkemi qilaamut portoqaaq inissaqaqalunilu, kisianni naartuersittarneq inissaqartinneqanngilaq. Maannami pavep naalagaaffiata Vatikanip Amnesty Internationalimut aningaasatigut tapersersuinini unitsippaa.
Katuullit palasiunerisa ilaata Renato Martinop oqaatigaa Amnestyp nutaamik paasisitsiniaanermigut suliassani sumiginnaraa, tassa naartuersittarneq pillugu arlaannaannulluunniit tapersersuinngitsutut inissisimajunnaartoq.
Kisianni Amnestymit oqaatigineqarpoq naartuersittarneq eqqortuusutut eqqunngitsuusutulluunniit oqaatigisimanngikkitsik. Kisianni naartuersittarneq periarfissaasariaqartoq, tassa naartulerneq pinngitsaalisaalluni arneriffigineqarnikkut imaluunniit qanigisarivallaakkamik atoqarteqarnikkut pilersimappat.
Amnesty Internationalimi allaffeqarfiup pisortaata tulliata Kate Gilmorep nutaarsiassaqartitsivimmut Reuterimut oqaatigaa katuullit qullersaqarfiata naartuersittarnermut isummamik illuinnaasiortumik oqaatigineratigut inuit pisinnaatitaaffii pillugit sulineq ulorianartorsiortileraa.
Kisianni katuullit naalagaaffianni Vatikanimi nalornisoqanngilaq.
Amnesty inuit pisinnaatitaaffiinik sorsuutiginnittutut atorsinnaajunnaarpoq taamaattumillu katuullit tamarmik suliniaqatigiiffimmut tassunga aningaasatigut tapersersuinertik unitsittariaqarpaat.
