Pave Benedikt utoqqatserpoq
Canada-mit aallartitat indianerit høvdingiannit Phil Fontaine-ni siulersorneqartut Pave Benedikt minutsinik 15-inik sivisussusilinnik ippassaq Rom imi oqaloqatigaat. Pave-mik oqaloqateqarnerup kingorna Phil Fontaine tusagassiortunik oqaloqateqarluni oqarpoq, Canada-mi indianerit naggueqatigiillu inuit meerartaasa amerlasuut angerlarsimaffimminnit atuarfinnut aallartitaallutik naalliutitaasarsimanerat Pave ajuusaarutigigaa.
Indianerit naggueqatigiillu inuit meerartaat 150.000-it missaannik amerlassuseqartut atuarfinni najugaqarfiutigisuni upperisarsiortunit aqunneqartuni ukiuni arlalinni atornerlunneqartarsimapput.
Phil Fontaine tusagassiortunik katersortitsinermi tusagassiortunit arlaleriarluni aperineqarpoq, Pave-p utoqqatserluni oqarnera naammannersoq, maanngarpugut Pave-mit utoqqatserfigineqaqqulluta tamannalu pivoq, naamagisimaarinnippugullu Phil Fontaine oqarpoq.
Pave-p utoqqatserluni oqaloqatigineqarnerani naggueqatigiit Inuit sinnerlugit Mary Simon suliniaqatigiiffimmi Inuit Taperiit Kanatami siulittaasoq aamma indianerit sinnerlugit Peter Irniq Pave-mik oqaloqateqarput.