Italiamiu operamik erinarsortartoq tusaamasarsuaq Luciano Pavarotti ullaassaq 71-inik ukioqarluni toquvoq.
Pavarotti suut tamaasa eqqarsaatigalugit inuuvoq malunnaatilik, inuk nunarsuarmi tusaamasaq inuttut nammineq immikkoorutilik tupinnaannartumillu ersarissumik erinalik operamik nuannarisallit amerlanngitsuinnaasut avataatigut aammattaaq nuannarineqarluni. Opera nuannarineqalersippaa José Carreras aamma Placido Domingo peqatigalugit tenorit pingasuullutik opera inuppassuarnut siaruartikkamikku. Inga Nielsen ukiuni 30-ni operamik erinarsortartunik pitsaanerpaanik tusarnaagaqartarsimavoq, Pavarotti erinarsoqatigalugu qanoq ippa? Soorunami tamanna misigisaavoq annertooq, aammami erinarsortartuummat tupinnaannartoq nuannerluinnartumik erinalik. Tupinnaannartumik pissutsinik malinnaalluartuuvoq inussiarnersuullunilu. USA-mi San Diegomi La Bohêmep suliarineqarnerani erinarsoqatigaarput, tassani Rudolfo erinarsorpaa uangalu Musetta erinarsorlugu taamaalillungalu ajoraluartumik angut taanna isiginnaartitsisarfimmi asanninneq pillugu toqqaannartumik takutitseqatiginngitsoorlugu. Kisianni taassuma ingerlanera tamaat peqatigaara, isumaqarpungalu Pavarottip tupinnaannartumik erinaqarnini qanorlu teknikkeqarnini alutornaqutigigaa, tassami aatsaat taama inummik naammagittartigisumik erinagitsigisumillu takusaqarpunga.
