Patermik tunniussaqarsinnaanermut periarfissat piffissami kingullermi nunatsinni sammineqangaatsiarput
Tamanna tunngavigalugu Peqqinnisaqarfimmiit maanna nalunaarutigineqarpoq patermik tunniusaqarsinnaasutut aamma maani nunatsinni allatsittoqarsinnaasoq.
Taamatut allatsissinnaanissamut piumasaqaatit ilaatigut tassaapput 18-inik ukioqalereersimanissaq, aammalu peqqilluinnartuunissaq. Tamatuma saniatigut aaversittartutut allatsittoqassaaq, taamaalilluni aaversinnikkut HIV, hepatitis allallu nappaatigineqannginnersut misissorneqarsinnaasarniassammat.
Nunatsinni taamaallaat illoqarfinni tallimani - tassalu Ilulissani, Aasianni, Sisimiuni, Nuummi aamma Qaqortumi - aaviisaqarfeqarmat illoqarfinni taakkunani najugaqartut kisimik patermik tunniussisartut allattorsimaffiannut allatsissinnaassapput.
Aamma tunniussisartunngorusuttup patini pisariaqartinneqalissagaluarpat Rigshospital-imukartariaqalersinnaanini piumassuseqarfigisariaqaraa, peqqinnisaqarfimmiit erseqqissaatigineqarpoq.
Patermik tunniussisartutut allatsisimasut patiat nunarsuarmi sumiluunniit atorneqaratarsinnaavoq. Assersuutigalugu inuttut sananeqaatit immikkoorutaat inuup Italiami najugaqartup pisariaqartitaanut assinguppata - taava Rigshospitalimut aggersaasoqassaaq, pateq atorneqartussaq tassani peerneqareerpat Italiamut nassiunneqassammat.
Akerlianik aamma nunatsinni katsorsagassat patermik pisariaqartitsissappata nunarsuaq tamakkerlugu inuit 21 millionit missilorlugit amerlassuseqartut nunatsinnit katsorsarneqartariaqartut isumalluutiginiarsinnaavaat, tassa paterminnik tunniussaqarsinnaasutut allatsisimasut nunarsuaq tamakkerlugu 21 millionit missiliorlugit amerlassuseqarmata.
