Pasilliutit imaaginnavipput

Suliffeqarfik takornarianik sullissiviusoq, juullip inuata allakkerivigalugu aamma kaffisorniartarfisoq, sapaatit akunneri marluk matuma siornatigut akiliisinnaajunnaartutut nalunaarutigineqarpoq.

Suliffeqarfimmik pisiumasut arlaqartut saaffiginnissimagaluartut, Nuuk Tourismemi ulluinnarni aqutsisuusup Jon Krogip oqaatigaa, suliffeqarfimmili pissutsit paasineqaraangata, pisikumagaluit tunuartarsimapput.

Direktøriusimasoq Therese Kreutzmann peqquserlussimasutut politiinut nalunaarutigineqarsimavoq.

- Therese Kreutzmann peqquserluuteqarsimasutut politiinut nalunaarutiginikuuarput, Jon Krog oqarpoq.

Siulersuisuni siulittaasoq Otto Strømmanili allatut isumaqarpoq, Nuuk Tourismep akiliisinnaajunnaarluni nalunaarutigineqarneranut direktørsiusimasoq pisooqataasimanersoq Otto Strømman aperaarput.
 
- Naamerluinnaq, Otto Strømman akivoq nangillunilu.

-Suliffeqarfiup ingerlaannarnissaannut matusariaqarneranulluunnit Therese Kreutzmann pisuussuteqanngilaq, Otto Strømman oqarpoq.

Therese Kreutzmann immiullugu apersoneqarumanngilaq oqaatigaluguli, akiliisinnaajunnaarneq imminerminut attuumassuteqanngitsoq. Ulluinnarnilu aqutsisut oqaatigisaannut ima oqarluni.

- oqaatigisimasani nammineq akisussaaffigissavai, Therese Kreutzman oqarpoq.

Taassuma pisortatut atorfini apriilip qaammataani qimappaa, peqqissutsikkut atukkani pissutigalugit.  

Jon Krog Nuuk Tourisme-mi ulluinnarni aqutsisutut juunip aallaqqaataani sulilerpoq. Suliffeqarfik ingerlanneqarnermigut tunngavissaqanngitsoq akisussaaffigilerlugu, tassani sulisut akissarsiassaannut akiligassannullu akissaqanngitsoq.

- Suliat ingerlanneqartut ingerlatiinarneqarnissaat, akiligassat akilerneqarsinnaaqquullugit. Taavalu suliap tullerivaa suliffeqarfimmik pisisinnaasumik ujarlerneq, naggataatigullu suliffeqarfiup matuneqarnissaanut piareersarsimavunga tassalu taamaaliorpunga Jon Krog oqarpoq.

Jon Krog isumaqarpoq siulersuisut akisussaaffitik isumagisimanngikkaat.

- Suliffeqarfiup tapiissutinik pisarunnaanera kingorna suliffeqarfiup ingerlanneqarnisaanut malittarisassat allanngortinnissaanut akisussaasuupput, aamma suliffeqarfimi aqutsisut aningaasanullu missigersuutit isornartussarsiornissaannut pisussaafeqarput, tamakkualu tamaasa malinneqanngillat, Jon Krog oqarpoq.

- Naatsorsuutini 2010-meersumi kukkunersuinersiuisut arlalinnik oqaaseqaateqarput, suliffeqarfimmilu naatsorsuutit pillugit oqaaseqaatit siulersuisunit arajutsineqarsinnaanngillat, suliffeqarfimmilu pissutsit qanoq ittuunerat nalunngittariaqaraluarlugu, Jon Krog oqarpoq.

Suliffeqarfiup ingerlanneqarneranut siulersuisut akisussaassuunerat siulersuisuni siulittaasup Otto Strømmanip isumaqatigaa.

- Suliffeqarfiup aningaasatigut ingerlanneqarnera nakkutigilluarsimagatsigu oqarsinnaavunga. Taamaattorli siorna naatsorsuutit ajorneri pillugu eqqumanerusimasinnaagaluarpugut, Otto Srømman oqarpoq.

Suliffeqarfimmi pisortaasimasup peqquserlussimaneranik politiinut nalunaaruteqartoqarsimanera politiiniit uppernarsarneqarpoq, peqquserlussimanernillu suliat amerlammata pineqartoq qaammatit arlaqartut qaangiuppata aatsaat suliarineqarsinnaasoq politiit oqaatigaa.

Nuuk Tourism pingasunik sulisoqarpoq, taakkua saniatigut kaffisorniartarfimmi Cafe Santami  tiimimusiaqarlutik sulisut tamamik soraarsinneqarput.