Pas-itaarniarlutik qinnuteqartut amerlalluinnartut
Kalaallit Nunaanni Politiit naapertorlugit ukioq manna september tikillugu innuttaasut 5.000-ngajaat qinnuteqarsimapput pas -ertik pisoqalisoq nutartertinniarlugu imaluunniit aamma inuunerminni siullerpaamik pas-itaarniarlutik.
- Tamanna takusinnaavarput 2022-mi pas-it agguaanneqartut amerlassusaasigut, aamma corona sioqqullugu ukiumut pas-itaarniartut 4.000-it 5.000-illu akornanni amerlassuseqartartut qaangerlugit manna tikillugu qinnuteqartoqarsimammat, Emil Maegaard-Hofmann nassuiaavoq. Taanna Kalaallit Nunaanni Politiit allaffeqarfianni pisortaavoq.
Pas-itaarniartut marloriaatingajammik amerleriartut
Kalaallit Nunaanni politiit ukiumoortumik kisitsisaataat naapertorlugit coronap pileruttorfiani 2020-mi pas-it 2.147-it agguaanneqarsimapput. Ukiorlu manna september tikillugu marloriaatinngoreersimallutik.
Innuttaasut angalaneruleqqinnerannik aammalu piffissami kingulliunerusumi innuttaasut MitID-taarniarnerannut tunngatillugu pas-itaarniat taamak amerlatiginerannut ilimagissallugu pissutissaqarluarpoq.
Emil Maegaard-Hoffmann-ip erseqqissaatigaa Politiit innuttaasunik apersuineq ajortut pas sumut atorneqassanersoq:
- Taamaattorli innuttaasunit arlalinnit paasivarput angalanissamut periarfissat annertusinerisa kingunerisaanik angalaniartut amerleriaqqissimasut, tamatumalu saniatigut ilimanartorujussuuvoq qinnuteqartut akornanni innuttaasut ilaasa MitID- taarniarnerminnut atatillugu qinnuteqarsimasut, allaffissornermut pisortaq nassuiaavoq nangillunilu:
AAMMA ATUARUK Innuttaasut 5.000-ngajaat MitID amigaatigaat - Timotheus Petersen taakkununnga ilaavoq
MitID-taarniarnermi kinaassutsimut uppernarsaat ajornartorsiortitsisoq
Innuttaasut nunaqarfinneersut aammalu illoqarfinni avinngarusimasuneersut MitID-taarniarnermut atatillugu ajornartorsiuteqartartut KNR-imut oqaluttuarineqartarpoq, ajornartorsiutillu amerlanerpaatigut kinaassutsimut uppernarsaammik atorsinnaasumik amigaateqarnermik pissuteqartartoq aamma ersersinneqarpoq.
Taamaaliluta aamma KNR-imit oqaluttuarisimasatta ilagaat innuttaaasut ilaat iliuusissaaleqillutik allatullu iliorsinnaanngitsutut misigisimallutik kilometerit uuntritillit imaatigut angalasariaqartarsimasut, taamaakkaluartorli aamma ikiorneqarfissaminni angusaqanngitsoortarsimasut kinaassutsimut uppernarsaat atorsinnaasoq amigaataasarmat, kinaassutsimullu uppernarsaatit atorsinnaasut tassaapput pas imaluunniit biilernermut uppernarsaat.
AAMMA ATUARUK Naalagaaffiup Digitalimik Sullissinermut Aqutsisoqarfia: Kalaallit Nunaanni pissutsit immikkuullarissut isiginiarneqarput
MitID-taarniarnissamut tunngatillugu Nunaqarfiit Peqatigiiffiannit KANUNUPE-mit kinaassutsimut uppernarsaammik piumasaqaatigineqartut annikillisinneqarsinnaanissaannik noqqaassutigineqarpoq, tamannalu Danmarkimi digitalimik sullissinermut aqutsiveqarfimmit naaperiarneqarsimalereerpoq, ilaatigut kinaassutsimut uppernarsaatit allat (sumi najugaqarnermut uppernarsaat kuisinnermut uppernarsaammik imaluunniit katissimanermut uppernarsaammik ilallugu) kinaassutsimut uppernarsaatigineqarsinnaanngortinneqarlutik.
Pas sapaatip akunneri arfinillit tikillugit utaqqineqarsinnaasarpoq
Innuttaasut pas-itaarusuttut politeeqarfimmut qaninnermut ornigullutik saaffiginnittussaapput, saaffiginninnermi kinaanermut uppernarsaammik pas-imullu assitassamik nassartussaapput. Emil Maegaard-Hoffmann oqaluttuarpoq qinnuteqarnermiit pas-itaarnissap tungaanut sapaatip akunneri arfinillit utaqqisoqarsinnaasartoq:
- Qinnuteqaat uppernarsaatillu Europamut nassiunneqartussaapput, tassanilu suliarineqarlutillu sananeqartarput. Pas-ip sananeqareernerata kingorna Nunatsinnut nassiunneqartarput, apeqqutaallunilu assartuinerup sivisussusaa sapaatip akunnerini arfinilinni utaqqineq sivisussuseqarsinnaasarpoq, tikiunneqareerpallu innuttaasup politeeqarfimmut aasussaassavaa, Kalaallit Nunaanni politiit allaffeqarfianni pisortaq Emil Maegaard-Hoffmann oqaluttuarpoq.