Partiit uran pillugu: Kalaallit Nunaat nammineq aalajangiisussaavoq
Taamatut inerniliisoqarnera Aatsitassaqarnermut Naalakkersuisup Jens Erik Kirkegaardip isumaqatigaa, uranimilli piiasoqalersinnaanerannut akisussaaffik Kalaallit Nunaanniinnerarlugu.
Inuit Ataqatigiit sinnerlugit inatsisartunut ilaasortaq Naaja Nathanielsen, Atassutillu siulittaasua Gerhardt Petersen tamatumunnga isumaqataapput.
Urani pillugu naluunaarusiat marluk sapaatip-akunnerisa pingasut ingerlaneranni saqqummersinneqarput. Siulleq Naalakkersuisunit suliakkiutigineqartoq, kingullerlu Danmarkip Kalaallit Nunaallu ataatsimoorullugu suliakkiutigisimasaat.
Danskit kalaallillu nalunaarusiaata inernilerneqarnera, Namminersorlutik Oqartussat nalunaarusiarisimasaannut akerliuvoq, tassami danskit kalaallillu ataatsimoorullugu nalunaarusiaanni oqaatigineqarmat kalaallit kisimiillutik urani pillugu nammineq aalajangiisinnaanngitsut, uranimik piiaaneq illersornermut sillimaniarnermullu tunngassuteqarmat.
Uranimut tunngasunut Nunatta nammineq aalajangiisinnaassuseqarnera, Inuit Ataqatigiit sinnerlugit inatsisartunut ilaasortap Naaja Nathanielsenip isumaqataaffigaa, uranitalinnilli piiasoqalersinnaanissaa illuatungilerlugu:
- Kalaallit Nunaata uran pillugu nammineq aalajangiisinnaassuseqarneranik Naalakkersuisut oqarnerat isumaqatigaarput, uranimilli piiaasoqalersinnaanissaanut aalajangiisoqalernera isumaqatiginatigu, Naaja Nathanielsen oqarpoq.
Pisuussutillu uumaatsut Kalaallit Nunaata nammineq akisussaaffigigai, Atassutip siulittaasuata Gerhardt Petersenip qularutiginngilaa:
- Uagutsinnut qularnaappoq aatsitassanut tunngatillugu Nunatta akisussaaffiup tamaa tigunikuugaa, Atassutip siulittaasua Gerhardt Petersen oqarpoq.
Inuit Ataqatigiit Atassullu Aatsitassaqarnermut Naalakkersuisumik Jens Erik Kirkegaardimik taamaalillutik isumaqateqarput, naak Inuit Ataqatigiit uranisiortoqarnissaanut akerliulluinnaraluartut.
Uranimilli piiaasoqarlunilu avammut tunisassiortoqassappat, Danmark matumani peqataatinneqartariaqartoq, Demokraatit siulittaasuata Jens B. Frederiksenip oqaatigaa, tassami illersornissamut-, sillimaniarnermut nunanullu allanut politikkip Danmarkimit akisussaaffigineqarnissaa, Namminersorneq pillugu inatsimmi allassimammat, Jens B. Frederiksen oqarpoq:
- Namminersorneq pillugu inatsit naapertorlugu taamatut oqartoqarpoq. Puigussanngilarput maani Nunatsinni aalajangiigatta, aamma innuttaasut aperineqarmata. Namminersorneq pillugu inatsit taama isikkoqartillugu innuttaasut amerlanerpaartaasa akueraat, Jens B. Frederiksen oqarpoq, nangillunilu:
- Tamanna ataqqisassaavoq, aamma isumarput naapertorlugu uagut politikeriusugut ataqqisariaqarparput innuttaasut taamanikkut oqariartuutaat, Demokraatit siulittaasuat Jens B. Frederiksen oqarpoq.
