Partiit siuttui: Ullumi uku qineqqusaarutigissavagut
Ullumikkut qinersisoqassaaq.
Nalunaaqqutaq qulingiluanut qinersivissat ammassapput, nunarpullu tamakkerlugu taasisinnaasut 41.000-t qinersiartorsinnaalissapput.
Isumasiuinerit upperissagaani Inuit Ataqatigiit nunatsinni partiini annerpaanngussaaq.
HS Analyse nutaarsiassaqartitsivillu, Sermitsiaq, suleqatigiillutik isumasiuneranni Inuit Ataqatigiit qinersinermi ingerlalluassangatinneqarpoq: Isumasiukkat 36 procentiisa IA qinerniarpaat. Tassa IA aqqaneq-marlunnik Inatsisartuni marlunngorpat qinersereernermi ilaasortaatitaqalissasoq, isumasiunermi erserpoq.
Isumasiunerlu Siumumut nutaarsiassatsialaanngilaq ilaasortaatitakinnerulissangatinneqarmat.
Partii taanna qinersinermi 23 procentinik qinersiseqassangatinneqarpoq, taamaalillunilu ataatsimik ilaasortaatitakinnerulissangatinneqarluni.
Partiit siulittaasuisa oqallinnermi suna pingaarnerpaatut oqaatiginiarneraat qinersinissaq sioqqullugu aperaagut.
-Uatsinniit pingaarnerpaajunikuuvoq qineqqusaarnerup tamaat isigalugu ineriartortitsinissaq qulakkiissagipput, Demokraatit siulittaasuat, Jens Frederik Nielsen, oqarpoq.
AAMMA ATUARUK Ilisimatooq siulittuisoq: Isumaqatigiinngitsut naapeqatigiissapput
Atassutip siulittaasuata oqaaserpassuaqanngikkaluarluni pingaartinnerpaasani oqaatigaa.
- Inuk qitiutillugu atugarissaarneq. Taanna. Partiimi Atassummi pingaartitarivarput taanna, Aqqalu Jerimiassen oqarpoq.
Inuit Ataqatigiit siulittaasuat, Múte Bourup Egede, isumasiuineq ilumuussappat, qinersinerup unnukkuani nalliuttorsiornissaminut qilanaarsinnaasoq naalakkersuisuutitassaminillu isumaqatigiissusiulereersinnaasoq.
- Inuit Ataqatigiit innuttaasut atugaat, ulluinnarni atugaat qitiutillugit, siunissamut nutaamut, piffissamut nutaamut ikaarsaarnissamut siuttuunissaminut piareersimasoq, taanna oqarpoq.
Suleqatigiissitsisunut isumaginninneq pingaarneruvoq.
- Patajaassuseq pisariaqartipparput. Meeqqat inuusuttullu ikiortariallit ikiussavagut. Qinigaaffimmi tullermi pingaarnerusoqarsinnaanngilaq, Tillie Martinussen, oqarpoq.
Suleqatigiissitsisut Inatsisartunut isertitaqarnavianngitsut isumasiuinermi erserpoq.
AAMMA ATUARUK Ulloq aalajangerneqarpoq: Apriilip ulluisa arfernat qinersissaagut
Partiip Siumup iluminni avissaartuukkaluarlutik, toqqaannanngitsumillu qinersisariaqarnissatsinnut pissutaasoq, ataatsimoorneq suleqatigiinnerlu partiip siulittaasuata pingaartippaa.
- Pingaarnerpaatut naatsorsuutigaara suleqatigiikkusussusermik anersaaqassalluta oqariartuuteqassalluta. Inuuiaqatigiit ataatsimoortut pilersinneqarnissaanut kissaatigineqartoq, tassaavoq qinikkat suleqatigiinnissaat, Erik Jensen, oqarpoq.
Innuttaasut atugarissaarnissaat Naleqqap siulittaasuata, Hans Enoksenip, pingaartippaa.
- Inunnik isumaginninnermut tunngasut taakku pingaartitagut aamma anguniaqqissavagut.
Nunatta Qitornaasa siulittaasuata Vittus Qujaukitsup partiit siuttuisa oqallisinnginneranni apersorneqarnissani kissaatiginngilaa.
Partii taanna ilaasortaatitamik ataatsimik annaasaqarnissaa isumasiuinermi erserpoq.
- Inatsisartunut, kommunimut, ilagiit sinniisaannut nunaqarfinnilu aqutsisunut marlunngorpat apriilip ulluisa arfernanni qinersisoqassaaq.
- Nunatsinni qinersivissat katillutik 72-iupput.
- Taasivissat Nuummiit nassiussat apuuffissaannut ullut unnuallu qulit iluanni tikiunneqarput.
- Ulloq qinersiffissaq sioqqullugu allakkatigut qinersisoqassasoq nunatsinni taasisinnaatitaasunut tamanut kaammattuutigineqarpoq. Coronamik nunatsinni qaammat ilivitsungajak tunillatsissimasoqanngikkaluartoq coronallu nunarsuaq tamakkerlugu tuniluunnnerata ajornartoortitsinera peqqutaalluni taamaaliortoqarpoq.
- Qinersivissat ullaakkut nalunaaqutaq qulingiluaniit unnukkut nalunaaqutaq arfineq-pingasut tungaannut ammassapput.
- Nunatsinni innuttaasuni taasisinnaatitaasut 41.000-t missiliorpaat.
- Inatsisartunut ilaasortanngortussatut qinikkat 31-usarput. Inatsisartunut qineqqusaartut 189-iupput.
- Kommuninut ataasiakkaani tallimaasunut qineqqusaartut katillutik 254-iupput