Partiit siulittaasuisa Kuupik akerlerisatut nikagisassaanngitsutut taavaat

Siumup siulittaasuata Aleqa Hammondip Kuupik V. Kleist qinigaaffiup kingorna nipaannera maluginiarsimavaa. Tunuarneratalu kingorna inuusuttut akisussaaffimmik tigusisussanngornerat pissusissimasoortugut isigaalugu.
 
- Isumaqarpunga partiini tamani assigiinngitsuni inuusuttut akisussaaffimmik tigusisarnerat takussaareersoq. Maannakkullu Inuit Ataqatigiit tassunga killilesimasoq. Nuannaarutissaavoq, aamma pissusissamisoorpoq. Partiimi inuiaqatigiinni tamani katersuuffiuniarluni siunnerfeqaraanni, allallu periarfissittuarnissaat pingaaruteqartuaannarpoq, sumiluunniit partiimi ikkaluaraanni, Siumup Naalakkersuisullu siulittaasuat Aleqa Hammond oqarpoq.
 
Aleqa Hammondip Kuupik V. Kleist inuttut qanimut ilisarisimanagu nassuerutigaa, illuatungerissallugulu pissanganartuusimasoq oqaatigalugu.
 
- Qineqqusaarfiup nalaani Kuupillu qanimut illuatungeriisinneqarpugut. Tamannalu soorunami innuttaasut isummersorneranut aamma taasinerannut sunniuteqarpoq. Tassuunartaatigullu isumaqarpunga Kuupik illuatungerissallugu pissanganartuusoq aamma nuannersuulluni. Maannakkullu partiimi siulittaasuujunnaarluni akisussaaffimmik allanut tunniussinera ataqqinartuuvoq, Aleqa Hammond oqarpoq.
 
Aleqa Hammondip inuusuttut akisussaaffimmik tigusisut partiip iluani eqqissinermik pilersitsiumaartut ilimagaa , aamma partiimi siulittaasussaq ingerlatsillualerumaartoq.
Inuusuttut akisussaaffimmik tigusisussaq tikilluaqquaa sulilluarnissaanillu kissaallugu.
 
Atassutip Siulittaasuata Gerhard Petersenip Kuupik V. Kleistip kinaassusersiorani politikkikkut oqalliseqataasarnera maqaasissamaarpaa.
 
- Kuupik Vandersee Kleisti inuttut nalunngilluarpara Inatsisartuni Danmarkimi ilaasortaagallarmalli. Taamaattumik suleqatigiilluartarnikuuvugut. Maqaasissavara, tassami politikkikkut eqqartuitilluni kinaassusersiorani eqqartuisinnaasarmat, taamaattumik taannartaa maqaasissaqaara, Gerhard Petersen oqarpoq.
 
Taassuma inuusuttut akisussaaffimmik tigusissamaarnerat ernumanartoqartinngilaa.
 
Demokraatini Siulittaasunngorlaap Anda Uldumip Kuupik V. Kleistip Inuit Ataqatigiinni siulittaasutut tunuarnera ugguaraa.
 
- Soorunami uggornarpoq, Inuit Ataqatigiinnut aamma uggornassaaq. Taamak inuk pitsaatigisoq, sullaritsigisoq suleqatikkuminartigisorlu. Assut ugguarpunga, Anda Uldum oqarpoq.
 
Demokraatit siulittaasorisimasaat Jens B. Frederiksen tunuarmat IA-tulli inuusuttut akisussaaffimmik tigusisimapput, tamannalu Anda Uldumip pissanganartutut isigaa. Isumaqarlunilu inuusuttut akisussaaffimmik tigusisussat akisussaaffimmik annertuumik tigusinissartik sillimaffigisariaqaraat.
 
- Massakkut takusinnaavarput naalakkersuinikkut qanoq ingerlanerliortoqartiginersoq. Taamaammat qinersinerup kingorna siuttut taarseratarsinnaapput, taamaalilluni aamma Inuit Ataqatigiinni siuttunngortussaq akisussaafferujussuarmik tigusisussaassagami piareersimasariaqarpoq, Demokraatit siulittaasuat Anda Uldum oqarpoq.
 
Partii Inuit siulittaasuata Kuupik V. Kleistip siulittaasutut tunuartussaaneranik tusatsiakkani aallaavigalugit siulittaasutut tunuarnera tupaallaatiginngilaa. Inuusuttullu akisussaffimmik tigusinerat partiimut inuiaqatigiinnullu iluaqutaasissaa ilimagalugu.
 
- Inuit Ataqatigiit ataatsimoorfiulernikuunera takuarput. Inuiattut namminersulivinnissaq  namminiilivinnissarlu siunertaralugit 2009-mi suaaruteqartoqarnikuunera isumalluarnermik annertuumik pilersitsimasoq allatorluinnaq ingerlanneqarnera inuit pakatsissutiginikuugaat, qinersinermi kingullermi takuarput. Taanna utertinneqarsinnaappat Inuit Ataqatigiinnut qularnanngitsumik iluaqutaassaaq, Nikku Olsen oqarpoq.
 
Partii Naleqqami siulittaasoq Hans Enoksenip 2009-mi qineqqusaarnermi illuatungeriinni Kuupik V. Kleist unammisassamini annerpaartarinikuuaa. Taamaakkaluartoq tamanna oqaaseqarfiginagu Kuupik V. Kleistip tunuarnera ataqqivaa.
 
- Isumaqarpunga nammineq taamatut aalajangernera ataqqineqartariaqartoq. Aamma ippinnartoqartinngilara, nammineq ersarissaatigereermagu nammineq kinguaariit nikittussaanerat pillugu tunuarami, Hans Enoksen oqarpoq.
 
Kuupik V. Kleist Inatsisartuni ilaasortaaginnassaaq.