Partiit siulersuisui ataatsimiipput folketingimut qinigassanngortitassat pillugit
Kikkut folketingimut qinigassanngortinneqassanersut partiit siulersuisuunerisa maanakkorluinnaq ataatsimiissutigileruttorpaat.
Ministeriunerup folketingimut qinersinissaq ullaap tungaani nalunaarutigereeraalu, partiini siulersuisut ataatsimiipput folketingimullu sassartitassassatik ataatsimiissutigalugit.
Lars-Emil Johansen Siumut, siornatigulli nalunaaruginikuuaa tulliani folketingimut qinersisoqalerpat qinigassanngortinniarluni. Josef Motzfeldt Inuit Ataqatigiit radioaviisimut oqarpoq, qinigassanngortinniarluni, aviisilu sermitsiaq malillugu Sofie Rossen folketingimut qinigassanngortinniarpoq.
Partip Atassutip qulakkeerlugu nalunaarutigaa Ellen Christoffersen folketingimut qinigassanngortissasoq. Atassut sisamanik pingasunillunniit qinigassanngortitaqassasoq nalunaarutigineqarpoq, Ellen Christoffersenip saniatigut kikkut qinigassanngortinneqarnersut oqaatigineqarsinnaanani.
Atassut folketingimut isertitaqassaguni Anders Fogh Rasmussen ministeriunirusussatut toqqarniarlugu nalunaarpoq.
Partii Siumut sisamanik qinigassanngortitaqarniarluni nalunaarpoq. Lars-Emil Johansen aggustip qaammataani nalunarpoq qinigassanngorteqqinniarluni.
Demokraatit sisamanik qinigassanngortitsiniarlutik nalunaarput. Qinigassanngortitassat pingasut qulakkeerlugit paasineqareerpoq, sisamaat kingusinnerusukkut nalunaarutigineqassaaq Arnat marluk angutilli marluk sassartinnissaat ilimagineqarpoq
Ministeriunermik toqqaasoqalerpat, Demokraatit konservativineersumik toqqaaniarlutik nalunaarput.
Kattusseqatigiit, Inuit Ataqatigiit aamma Siumup siulersuisuuneri maanakkut ataatsimiipput folketingimut qinigisanngortitassat kikkuuneri aalajangiiffigineqarnissaat pillugit.