Partiit siuariarnerat kinguariarnerallu nassuiaatissarsiorlugu

Folketingimut ippassaq qinersinermi Inuit Ataqatigiit kinguariarnerat sanngippallaartunik sassartitaqarnermik pissuteqarpoq, Siumullu siuariarnera inuusuttunik oqallorissunik sassartitsinermik pissuteqarluni. Sermitsiap aaqqissuisua Poul Krarup taama naliliivoq.

Akinik assigiikkunnaartitsisimaneq pillugu Lars-Emil Johansenip qineqqusaarnermini iluaaginninnini inuppassuarnit qinerneqaatigaa, aammalu inuusuttunik oqallorissunik Siumup sassartitaqarnera siuariarnermut iluaqutaasoq, Poul Krarup isumaqarpoq. Akinik assigiikkunnaartitsisimanerup kommunimut qinersisoqalerpat qineqqusaarutigineqaqqinnissaa ilimagaa, pissanganassanerarpaalu taamanikkussamut qanoq pisoqarumaarnera.

Siumut siuariarnerata angeqataanik naalakkersuisooqataat Inuit Ataqatigiit kinguariarput, tamannalu sassartitat sanngippallaarnerannik Poul Krarup pissuteqarsoraa.

-Kuupik Kleist eqqaassanngikkaanni Inuit Ataqatigiit sassartitaat sanngiippallaarsimapput, aammali akit assigiikkunnaarnerannik aaqqissuussineq pisooqataasoraa.

- Akit assigiikkunnaarsinneqarsimanerat qinersisartunit iluarineqarsimanngilaq, taamannalu IA-p kinguariaatigaa, Poul Krarup oqarpoq.

Demokraatit Folketingimut isertitaqarsinnaanerat ilimagineqarsimagaluarpoq. Qinersinermulli kingullermut naleqqiullugu 2 procentiinnarmik siuariarput. Demokraatit iluatitsinngitsoornerat

Poul Krarup-ip ima nalilerpa:

- Demokraatit Folketingimut qineqqusaartussaanngikkaluarput. Isumaqarpunga kommunimut qinersinissaq utaqqisimassagaluaraat. Demokraatit tunnuliaqutartik aaqqeqqaarsimasinnaagaluarpaat, ilumut nunatsinni siammarsimanertik qularnaarlugu.

Atassut 5 procent-mik kinguariarpoq, Poul Krarupilu isumaqarpoq tamanna Atassutip partiitut sanngiillisimaneranik takutitsisoq. Isumaqarpoq Atassut partiitut nutaamik eqqarsarluni, aqutsisuni inuusuttunik taarsertariaqarai.

Atassutip siulersuisuunerini ilaasortaq Aqqalu Abelsen, qineqqusaartunut ilaasoq, Atuagalliutinut oqarpoq partiip immikkoortortaminut ataqqinnippallaarnera Atassutip sanngeequtigigaa.

-Partii ullumikkutut tunuarsimaarunnaarluni siuarsaalluni qimuttuusariaqarpoq, Aqqalu Abelsen oqarpoq.

Utoqqalinersiat meeqqallu tapiisa naalagaaffeqatigiit akornanni assigiinnerunissaanik qineqqusaaruteqarneq Kattusseqatigiit 2 procentimik siuariarnerannut Sermitsiap aaqqissuisuata pissutaasoraa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat