Enhedslistenip Kalaallit Nunaannut tunngasunut oqaaseqartartuata, Christian Juhlip, Saammaateqatigiinnissamut isumalioqatigiissitap isumaliutissiissutimini inassutai nuannaarutigai.

Partiit saamerliit Saammaateqatigiinnissamut isumalioqatigiissitap inassutai nersualaarpaat

Saammaateqatigiinnissamut isumalioqatigiissitap isumaliutissiissutaa Danmarkimi partiinit talerperliusunit isornartorsiorneqarpoq, inassutigineqartulli Christiansborgimi partiinit saamerliusunit nersualaarneqarput.

Saammaateqatigiinnissamut isumalioqatigiissitap suliaata inernera Radikale Venstremit, Konservative Folkepartimit Dansk Folkepartimillu isornartorsiorneqarpoq, partiilli saamerliusut isumalluarnerorpalupput.

Ministeriunerusimasup Helle Thorning-Schmidtip (S) Danmarkip isumalioqatigiissitami suleqataanissaa 2013-imi itigartitsissutigaa.

- Saammaateqatigiinnissaq pisariaqartinngilarput, kalaallilli tamanna pingaartillugulu pisariaqartimmassuk tamanna ataqqilluinnarpara. Taamaammat oqallinneq qanoq ingerlassanersoq malinnaavigilluinnassavarput, naalagaaffeqatigiit Naalakkersuisut siulittaasuata Aleqa Hammondip peqataaffigisaanik Københavnimi ataatsimeereersut ministeriuneq tusagassiortunik katersortitsinermi taamani taama oqarpoq.

AAMMA ATUARUK Isumakkeerfigeqatigiinnissaq pillugu ataatsimiitialiorniarnermi Danmark akuunngilaq

Socialdemokraatilli Kalaallit Nunaannut tunngasunut oqaaseqartartuata Karin Gaardstedip isumalioqatigiissitap suliaata inernera pitsaasutut ullumikkut isigaa.

"Inassutigineqartut Kalaallit Nunaata iluani qanoq iliortoqarsinnaaneranut tunngassuteqarput. Aamma inassutigineqartut pitsaasuupput, aamma qularnanngitsumik iluaqutaasinnaapput", KNR-imut allakkatigut akissuteqarluni taama allappoq.

Karin Gaardstedilli isumaliutissiissummi inassutigineqartut ataasiakkaat oqaaseqarfigerusunngilai, Kalaallit Nunaanni suliassaanerat innersuussutigalugu.

SF aamma Enhedslisten: Ilisimasanik oqaluttuarisaanermillu katersuivissaq pitsaasuuvoq

SF-illi Kalaallit Nunaannut tunngasunut oqaaseqartartuata Karsten Høngep inassutigineqartut oqaaseqarfigerusuppai. Taassumalu isumalioqatigiissitap suliai pitsaasutut isigai, naak isumaliutissiissummi inassutigineqartut 'oqaasiliorneri ersarippallaanngikkaluartut'.

- Isumaqarpunga isumalioqatigiissitap siunnersuutigisai pitsaasuullutillu siumut isigisuusut. Kalaallit Nunaanni aqunneqarsinnaasumik pilersitsiniartoqarnera pitsaasuusoraara.

Nunatsinni oqaluttuarisaanermut saammaateqatigiinnissamullu ilisimasanik katersuivimmik pilersitsinissamik siunnersuut tamatumani innersuussutigaa.

AAMMA ATUARUK Ilisimasanik katersivik, oqaatsivut utoqqatserfigineqarnerlu

- Nunap oqaluttuarisaanera, kulturi inuiaallu ataffigisat paasisaqarfiginissaannut itisiliinissamut periarfissiissaaq. Soorlu nunarsuarmi tamarmi avataanit pisunit aamma sunnertittoqartartoq, Karsten Hønge taama oqarpoq.

Kalaallit Nunaanni innuttaasut akornanni saammaateqatigiinnissaq ilumut pissutissaqarnersoq isummerfigerusunngilaa oqarlunili:

- Misigissutsit taama ittut pimooruttariaqarpagut (…). Kalaallit ilaanni taama initutigitillugit aamma uanni taamaassaaq, Karsten Hønge oqarpoq.

AAMMA ATUARUK Anbefalinger er spild af penge

Enhedslistenip Kalaallit Nunaannut tunngasunut oqaaseqartartuata Christian Juhlip isumaliutissiissut nersualaarpaa. Danmarkilli Saammaateqatigiinnissamut isumalioqatigiissitap peqataaffiginissaanut itigartitsinera suli uggoraa.

Taarsiullugu danskit naalagaaffiat aningaasatigut tapersersuisariaqarpoq, inassutigineqartut ilaat piviusunngortinneqarnissaannik Naalakkersuisut aalajangissagaluarpata, Christian taama isumaqarpoq. Assersuutigalugu Danmarkimi ilisimatusartut sullissiviillu oqaluttuarisaanermut saammaasseqatigiinnissamullu sullissivimmik pilersitsinissamut ikiuisinneqarsinnaapput, Christian Juhl taama oqarpoq.

- Oqaluttuarisaanermik suliaqarneq ilisimatusartunik pisariaqartitsiffiuvoq. Saammaateqatigiinnissaq sulissutiginiaraanni tamanna sullissivinnik tamatuminnga suliaqarsinnaasunik pisariaqartitsiffiussaaq.

Isumaliutissiissut Folketingip Kalaallit Nunaannut tunngasunut ataatsimiititaliaani oqaluuserisassanngortinniarpaa, ataatsimiititaliallu inassutigineqartunut aningaasatigut tapiissuteqarfiginissaannik danskit naalakkersuisuinut siunnersuuteqarsinnaanissaat neriuutigalugu.

AAMMA ATUARUK Josef Motzfeldt: Isumalioqatigiissitaq pisariaqanngilaq

AAMMA ATUARUK Aleqa: Inuit naleqassusaat pillugu isumalioqatigiissitaliorpugut

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!