Naleqqap siulittaasua, Pele Broberg.Assi: Malik Brøns / KNR

Partiit Pele Brobergip Naleqqami siulittaasuunerani suleqatigiinnissaq ima isigivaat

Naak IA Siumullu naalakkersuisoqatigiikkaluartut Demokraatillu Atassullu illuatungiliuttuugaluartut Naleqqap suleqatiginissaanut matu matoqqanngitsoq, partiit arlallit oqarput.

Pele Brobergip Naleqqami siulittaasunngorneranut pilluaqqusisut paatsuugassaanngillat.

Inatsisartut allaffeqarfianni "pilluaqqusisut" aamma "atuuffimmi ajunnginnerpaamik kissaassinerit" tusarsaapput.

Partiilli Naleqqap suleqatigiissinnaanerannik periarfissaqarnersoq aperigaanni partiit gangianni taama isumaqatigiittoqartiginngilaq.

IA-p Naleqqallu ukiumi ataasiinnarmi suleqatigeereerlutik naalakkersuisoqatigiinnerat ajalusoorpoq. Suleqatigiikkunnaarneratigut Naleraq illuatungiliuttunngorpoq, uanilu nutaamik suleqatigisassarsinngilaq. Demokraatimmi Atassullu suleqatigiinnissaminnut pisortatigoortumik isumaqatigiissuteqarnikuupput. Pingaartumillu Atassutip Naleqqamik suleqateqarsinnaanissani takujuminaatsillugu oqaatigaa.

AAMMA ATUARUK Aninerup kingorna: Inatsisartuni Naleraq kisimiivippoq

Partiit Naleqqamik suleqateqarnissamut ullumikkut periarfissanik qanoq isiginninnerannut atatillugu Atassutip partiit taakku marluk suleqatigiissinnaanissaat suli takujuminaatsippaa.

- Allanngortoqarnissaa ilimaginngilaq. Demokraatit isumaqatigiissuteqarfigereerpagut, tamannalu iluaraarput. Suleqatigiinneq taanna suli ineriartorpoq, tamannalu ingerlatiinnarniarparput, Atassutip siulittaasua, Aqqalu Jerimiassen oqarpoq.

Taassuma partiit marluk namminiilivinnissanut tunngatillugu marlunni assigiiinngilluinnartuni inissisimasut nassuiaatigaa. Naleraq namminiilivikkusuppoq Atassullu naalagaaffeqatigiinnermik illersuilluinnartuulluni.

Demokraatit: Akileraartarnermut politikkikkut suleqatigiissinnaavugut

Demokraatit suleqatigiinnissamut ammanerupput.

Namminiilivinnissamullu apeqqummut tunngatillugu isumaqatigiiffiunngikkaluartoq allatigut suleqatigiinnissamut periarfissat Demokraatit siulittaasuata, Jens-Frederik Nielsenip takusinnaavai.

Tamanna pingaartumik akileraartarnermut politikkimut aamma suliffeqarfiit akileraarutaannut tunngatillugu.

- Suna oqaluuserineqarnersoq apeqqutaalluni oqaloqatigiinnissamut piareersimajuaannarpugut, qularutiginngilaralu suleqatigiiffigisinnaasarpassuaqarluta, aamma suleqatigiiffigisinnaanngisaqarluta. Kisianni politikki taamaappoq, Jens-Frederik Nielsen oqarpoq.

Demokraatilli Atassullu maanna suleqatigiinnertik ilorrisimaarutigilluarlugu erseqqissaatigaat.

IA: Mattussinngilagut

Naleqqap siulittaasorisimasaata, Hans Enoksenip Inuit Ataqatigiit apriilimi naalakkersuisoqatigiunnaarnerannut atatillugu imminnut qanikkunnaarsimallutik oqaatigaa.

Maanna qaammatit tallimat qaangiupput, Nalerarlu nutaamik siulittaasortaarluni tassunga atatillugu Inuit Ataqatigiit gruppianni siulittaasoq, Agathe Fontain suleqatigiileqqinnissamut periarfissat pillugit ima oqarpoq:

- Inuit Ataqatigiinninngaanniit soorunami siunissami arlaannaannulluunniit mattussinngilagut, suliassat politikikkut suleqateqatigiinnikkut ingerlanneqartussaasuaannarput. Taamaammat mattussinianngilagut tassunga tungaanut.

Siumup IA-p suleqatiginera pingaarnerutinniaraa

Siumup politikkikkut oqaaseqartartuata, Doris J. Jensenip partiip partiinik allanik suleqateqarnissaanut matu ammajuaannarnerarpaa, taamaakkaluartorli erseqqissaavoq:

- Inuit Ataqatigiit suleqatiginerat qinigaaffiup tamaani pingaarnerutipparput, kisianni aalajangiiffigisassatut siunnersuutini isumaqatigiiffigisatsinni imminut tapersersornissamut ammajuaannarpugut. Tamanna naalakkersuisoqatigiinni illuatungiliuttuni atuuppoq, Doris J. Jensen oqarpoq.

Naleraq naalakkersuisoqatigiinni ilaaleqqikkusunnersoq KNR-ip Naleqqami siulittaasunngorlaat Pele Broberg arfininngormat apeqquteqarfigaa.

Taannalu ilaatigut ima oqarpoq:

- Aallaqqaammulli ersarissumik nalunaarutiginikuuarput, politikkimi akerassarsiniarlutik ilaaleruit sivisuumik atanavianngilatit. Suleqatigisassanik pilersitsiniarluta politikkikkut suliaqartuaannarpugut, tamannali sulissutiniakkatsinnik naleqassanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl