Partiit nittartagai nutaanngippallaarput

Nunatsinni partiit internetikkut nittartagaat qanoq ullutsinnut malinnaatiginerat raatiuaviisip paasiniarpaa.

Partiillu tamarmik internet-kut quppersagaat nutaanngippallaarput.

Siumup Nittartagaa kalaallisuinnangajaavik allassimavoq, nittartakkamillu aaqqissuisup qinersisoqalerneranik tusagaqarsimaneranik malunnaateqarnani.

Partiilli siunertai erseqqissumik allaaserineqarsimapput, kalaallisuinnarli allanneqarsimallutik. Qallunaatuinnaq oqaasillit Siumup nittartagaanut iseraluarunik siunertanik paasisaqarnavianngillat.

- Qallunaatut nutserneqarsimanngineranut peqqutaavoq aningaasanik amigaateqarneq piffissaaleqinerlu, Siumut partiani allatsi, Johannes Mathiassen, nassuiaavoq. Neriorsuivorli nittartagaq qallunaatut nutserneqarumaartoq.

- Qinersisoqarnissaata tungaanut nittartagaq qallunaatut kalaallisullu, ulloq allortarlugu immersorneqartassaaq Johannes Mathiassen oqarpoq.

Nittartartakkamut immiussaq kingulleq quppernermi siullermiippoq, tassani Hans Enokseni ilassinninnermut aningaasartuutit atornerlunneqarsimaneranut tunngatillugu allaaserisaqarsimavoq. Nittartakkap sinnerani allaaserisat suli nutaannginnerupput, partiip siulittaasuisa kikkuuneri kingullermik 2002-mi imiunneqarsimammata, tassa Jens Napaattooq siulittaasup tulliugallarmalli.

IA-p nittartagaa kalaallissut qallunaatullu allanneqarsimavoq, partiilli politikkikkut anguniagaat nittartakkami nassaassaanatik. Nittartagaq kingullermik immersorneqarsimavoq septemberip 19-iani, tassani nassuiaasiortoqarsimavoq partiip naalakkersuisunut ilaasortaasa, ilassinninnermut aningaasartuutigisimasaannut tunngasut.

IA-p nittartagaa qinersisoqalerneranut tunngasunik aamma allaaserinnissimanngilaq.

Atassut qinerssisoqarnissaamut suli piumasaqarpoq. internetikkullu nittartagaat upperissagaanni Augusta Salling suli patiimi siulittaasuuvoq. Nittartagarli qallunaatut kalaallisullu atuarneqarsinnaavoq.

Demokraatit qarasaasiaq qatsussimagunaaqaat. Nittartagaat kingullermik juunimi immersorneqarsimavoq, qinersisoqalerneranullu tunngasunik imaqanngilaq.

Kattusseqatigiit internetikkut nittartagaqanngillat.