Partiit naalakkersuisuutitaqartut qineqqusaarutaat pingaarnerit
- Inuit isumaginninnermik suliallit atuarfinni ikiorsiisinnaanerat periarfissaanerulertariaqarpoq. Pissutigalugu ilinniartitsisut ulluinnarni taamatut suliaqartarnerat annertooq klassini ataasiakkaani aamma meeqqanut allanut sunniuteqarnerluttartoq paasinarmat, Kattusseqatigiit Partiiata siulittaasua Anthon Frederiksen oqarpoq.
Ilinniartitsisulli saniatigut atuartut aamma eqqarsaatigineqartariaqartut, taassuma oqaatigaa. Atuartummi 11.klassi tigusinnaasariaqarpaat, soorlu aamma Atassut taama oqartoq.
Atuartut 11.klassersimasut ilinniaqqinnissamut ingerlariaqqinnerminni angusaqarluarnerusinnaapput, partiit taakku oqarput:
- Uagut taamanikkulli akerleraarput, aamma massakkut qineqqusaarnitsinni aalajangiusimavarput 11.klassit atulerseqqinneqartariaqartut, pissutigalugu atuarfinnit anisartut inuusuttuararpassuit ilinniagassanik ingerlariaqqinnissaminnut periarfissaqaratik uniinnartartut amerlavallaaqimmata, Anthon Frederiksen oqarpoq.
Atugarissaarneq, ineriartorneq kinaassuserlu qitiutillugit Demokraatit qineequsaarniarput:
- Atugarissaarneq Nunatsinni innuttaasunut pisariaqarluinnarpoq, tamanna assigiinngitsutigut anguneqarsinnaavoq. Ilinniartitaanermi meeqqat atuarfiisa pitsanngorsarnissaat matumani ilaalluinnarpoq, taassuma saniatigut ineriartorneq aamma aqqutissiivoq atugarissaarneq anguneqassappat. Assersuutigiinnarlugu aatsitassarsiorfiit iluanni pisariaqarluinnarpoq aallartitsinissaq, alumiiniumillu aatsitsiviliortoqarnissaa aamma pisariaqarluinnarpoq, suliffeqarfiit amerlasuut pilersinneqarsinnaammata, Demokraatit siulittaasuat Jens B. Frederiksen oqarpoq.
Suliniutinut angisuunut inatsit toqqammavigalugu Nunatsinni aatsitassarsiorneq maanna aallartisarneqartariaqarpoq, Jens B. Frederiksen aamma oqarpoq.
Inuit Ataqatigiit assingusumik oqarput, Nunatta aningaasarsiornera ilorraap tungaanut aallassappat suliffissaqarniarneq pitsaanerulertariaqartoq isumaqarput, aalisarnerlu kisiat isumalluutaasariaqanngitsoq, Inuit Ataqatigiit isumaqarput. Siulittaasuat Kuupik Kleist taama oqarpoq:
- Aningaasarsiorfissanik nutaanik pilersitsinissaq saneqqunneqarsinnaanngilaq, suliffissanik nutaanik pilersitsinermik tamanna kinguneqartussaammat, Nunatsinnilu aningaasarsiorfissanik nutaanik pisariaqartitseqigatta, Naalakkersuisut siulittaasorigallagaat, Inuit Ataqatigiinnilu siulittaasoq Kuupik Kleist oqarpoq.
