Partiit Folketingimut qinersisoqarnissaanut piareersalerput
Inuit Ataqatigiit siulittaasuat Kleist Kuupik oqarpoq, Inuit Ataqatigiit Folketingimut qineqqusaarnissaminnut piareersimalluinnartut.
- Piareersimavugut, qinigassanngortitassat qineqqusaarutissallu piariilerput. Kisianni soorunami qaqugukkut qinersinissap suaarutigineqarnera apeqqutaasarpoq, qinersinissaq nalunaarutigineqariarpat saqqummiussissaagut. Kuupik Kleist oqarpoq, Inuit Ataqatigiillu qinigassanngortitassaasa massakkut tusarliutinnginnissaat isumaqatigiissutigisimagitsik erseqqissaavoq.
Atassutip siulittaasua Finn Karlsen oqarpoq, Atassutip siulersuisuuneri aqagu ataatsimiissasut, Folketingimullu qinersinissaq ataatsimiinnermi eqqartorneqassasoq.
- Aqagu aappaaguaguluunniit 2009-mi qinersineqassagaluarpat soorunami qinigassanngortitaqassaagut, Finn Karlsen oqarpoq.
Atassut sinnerlugu qinigassanngortitassat suli inissinneqavinngitsut, Finn Karlsen oqarpoq.
Siumut siulersuisuuneri maannakkut angalapput, uterunillu ataatsimiissapput, tassanilu qinigassanngortitassat qineqqusaarutissallu aalajangerneqassasut, Siumup allattaa Mikael Petersen ilisimatitsivoq. Folketingimut ilaasortap Siumumeersup Lars-Emil Johansenip qinigassanngorteqqinnissi siusunnerusukkut nalunaarutigereerpaa.
Kattusseqatigiit partiianni siulersuisut aamma ataatsimiinniarput, qinersinissarlu nalunaarutigineqarpat piareersimassaagut Kattusseqatigiit partiiata siulittaasua Anthon Frederiksen oqarpoq. Naalagaaffeqatigiinnerup iluani inatsisit tunngaviusut, innuttaasunut assigiimmik atuutsinneqarnissaat Kattusseqatigiit pingaarnerutillugit saqqummiunniaraat, Anthon Frederiksen oqarpoq.
Demokraatit siulittaasuat, Per Berthelsen aamma Aalisartut Piniartullu Partiiata
siulittaasua, Leif Fontaine, oqaaseqartissinnaasimanngilagut:
