Partiit apriilimi qinersinissamut sassartitassaminnik annaasaqarput

Qaasuitsup kommuniani kommunalbestyrelsemut Atassut sinnerlugu ilaasortaq, borgmesterimut sinniisoq siulleq  Timooq Mølgaard, aamma Kattusseqatigiit partiiat sinnerlugu ilaasortaq Abel Karlsen partiiminniit tunuarput. Tunuartut partiiminii unittooqqaneq aamma siulersuisoqarniarnikkut ingerlanerlunneq tunngavilersuutigaat.

- Allatut ajornartumik aalajangertariaqalerpunga tassa Atassut qimattariaqalerlugu, Timooq Mølgaard Qaasuitsup kommuniani aningaasaqarnermut ataatsimiititaliami ilaasortaq taama oqarpoq, taannaannaanngilarlu partiiminit tunuartoq, Abel Karlsen ima oqarpoq.

-Kattusseqatigiit partiiat sinnerlugu ilaasortaangama, kommunalbestyrelsemut ilaasortatut partiip siulersorneqarnera naammaginnginnakku tunuarniuteqarlunga.

Partiit immikkoortortaqarfiisa unittooqqaneri tunuarnermi tunngavilersuutigineqarput.

-Immikkoortortaqarfik Ilulissani siulersuisoqarniarneq ukiuni kingullerni assut ajornartorsiutaavoq, Abel Karlsen oqarpoq, nassuiaallunilu siulersuisuni siulittaasoq aamma tulleq kisimiillutik ukiuni kingullerni ingerlatsisuusimasut.

Timooq Mølgaardip Qeqertarsuarmi immikkoortortaqarfiup ingerlanniarnerani ikiortissaaleqisimavoq

-Uangalu kisima immikkoortortaqarfik ingerlanniarsinnaanngilara partiip nuna tamakkerlugu qullersaqarfianiit ikiortissaqartinnanga. Aammali kommunimut qinersinissaq piareersarfigineqannginnera tunuarnermut tunngavilersuutigaat.  Kattusseqatigiit partiianni siulittaasup Anthon Frederiksenip Abel Karlsenip tunuarnera ugguaraa, partiillu Ilulissani immikkoortortaqarfituaata siulersuisoqarnikkut ajornartorsiornera nassuerutigalugu.

-Tassa Ilulissani immikkoortortaqarfimmi siulersuisoqarniarnermut tunngasut taakkua naammaginagit nalunaaruteqarpoq, suu ilisinarput, Kattusseqatigiit partiiata siulittaasu Anthon Frederiksen oqarpoq nassuiaallunilu Ilulissani februaarimi ataatsimeersuassallutik.

-Tassungalu atatillugu ajornartorsiutit ilanngullugit eqqartortussaavagut, Anthon Frederiksen oqarpoq.

Atassutip siulittaasuata Gerhardt Petersenip Timooq Mølgaardip partiimit tunuarnera ajuusaarnartutut oqaatigaa, Qeqertarsuarmilu Atassutip immikkoortortaqarfiata unittooqqanera nassuerutigigaa, Siulersuisulli nunap sinnerani immikkoortortaqarfinnik aallarnisaalluarsimasutut nalilerpaa.

-Immikkoortortaqarfiit assigiinngitsorpassuit siornatigut unittooqqasimasut taakkua aallarteraqqissimapput, taannalu soorunami qujanaqaaq.

Timooq Mølgaardilli Atassutip siulittaasua attaviginiassallugu ajornartittarsimavaa.

-Tassa takusinnaavara allagaani uani pitsaanerpaajusimanngitsoq, tassa attaveqaatit allat telefonit atorneqartarsimasinnaagaluarput ilaalu ilanngullugit, Gerhardt Petersen oqarpoq.

Atassutip Qaasuitsup kommuniani kommunalbestyrelsemut ilaasortaatitai marluinnanngorput kattusseqatigiit partiiat ataasiinnarmik ilaasortaatitaqalersoq.