Partiit anginerit isumaqatigiinngillat

Inatsisartunut aqagu qinersinissamut atatillugu partiit siulittaasui KNR-imit ippassaq unnukkut oqallitsinneqarmata, Inuit Ataqatigiit aamma Siumup akornanni saammaasseqatigiittoqaranilu qanilliallattoqanngilaq.
Allattoq Jens Thorin
marsip 11-at 2013 06:35

Taamaattumik Nunatsinni partiit annersaasut marluk Naalakkersuisoqatigiilersinnaanissaat toqqaannartumik oqallinnermi takujuminaappoq.

Qineqqusaarnermi  aatsitassarsiornermut atatillugu akitsuummik Royalties-imik taagorneqartumik atuisoqarnissaanik Siumup piumasaqaataa oqallisigineqangaatsiarpoq. Piumasaqaammi tamanna Aleqa Hammondip naggataa tikillugu aalajangiusimavaa.

Piumasarineqartoq tamanna Atassutip siulittaasuata Gerhardt Petersenip isumaqatigaa.

Partii Inuit sinnerlugit Nikku Olsenip ippassaq unnukkut oqaatigeqqippaa aatsitassat sapinngisamik annerpaamik Nunatta isertitaqaatigissagai, tamatumali qanoq anguneqarnissaa partip suli aalajangiiffigisimanngikkaa.

Aatsitassarsiortitseqatigiiffinnut maanna misissueqqissaarnissamut akuersissummik peqareersunut piiaanissamut akuersissuteqartoqartillugu akitsuummik royaltiesimik aamma piumasaqartoqarsinnaassasoq Aleqa Hammondip aamma aalajangiusimavaa.

Tamannali IA-p aamma Demokraatit ilumuunnginnerarpaat, maannalu royaltiesimik eqqussisoqarnissaa itigartilluinnarlugu.

IA-p siulittaasuata Kuupik V. Kleistip aamma Demokraatit siulittaasuata Jens B. Frederiksenip erseqqissarpaa, maanna aaqqissuussineq atorlugu, tassa royalties-imik atuisoqanngikkaluartoq, Cairn Energy Qeqertarsuup avataani 2011-mi uuliamik ujaasilluni qillerimmat, Nunarput hunnoruju millionit koruuninik arlalinnik isertitaqarmat, aamma naak uuliamik kuseriarnermilluunniit nassaartoqanngikkaluartoq.

Siumup aamma Atassutip pissaanermik tigumiaqarallaramik, misissueqqissaarnissanut akuersissutinik isumaqatigiissuteqarnerminnut atatillugu royaltiesimik piumasaqaateqarsimannginnerat, Kattusseqatigiit Partiiata siulittaasuata Anthon Frederiksenip tamatumunnga atatillugu tupigusuutigaa.

Tamatumunngalu atatillugu Kuupik V. Kleistip oqaatigaa, akitsuummik royaltiesimik Nunatta karsiata isertitassai inuiaqatigiinnit ingerlaannartumik atorneqarnavianngitsut.

Tassami aningaasat Aatsitassarsiornermit Aningaasaateqarfimmut nakkaatinneqartussaapput, tassa naalagaaffiup ataatsimoortumik tapiissutaasa ikilisaatissaannik Danmarkimut akiliisoqareernerata kingornagut.