Partiit amerlanerit inuusuttaat Sisimiuni isumasioqatigiipput
Sorlaap isumasioqatigiisitsinerannut ilaapput partiit inuusuttaat tamarmik, Kattusseqatigiit Partiiat minillugu. Kattuffiillu allat, soorlu Sukorseq, KIK, Sanningasoq Tungujortup inuusuttaat Paamiuniit, savaatillit inuusuttaat, ICC-ip inuusuttaat naggueqatitsinniillu Alaskamiit Canadamiillu inuusuttunik marlunnik aamma ilaasoqarpoq.
Sorlaap isumasioqatigiisitsinerani kiisalu pikkorissartitsinerani Aqqaluk Lynge naggueqatigut pillugit sisamanngormat oqalugiarpoq, taamatullu ICYC, ICC-p inuusuttaat naggueqatitsinni inuusuttuuneq ICYC-llu suliniutai suliarisimasaallu pillugit oqalugiarlutik.
Isumasioqatigiisitsinermi naggueqatigut annertuumik oqaluuserineqarput, Sorlammullu isumasioqatigiittunut ilaasut naggueqatitta qanoq iluaqutigisinnaaneraat oqallisigineqarpoq, isumasioqatigiinnerlu Sorlaap ilaasortaaniit tigulluarneqarluni.
Ullumi arfininngornermi isumasioqatigiinermi isumasioqataasut eqimattakkaarlutik saqqummiussipput, naggueqatitta qanoq suleqatigineqalernissaat pillugit.
Isumasioqatigiinnermut, Knud Rasmussenip Højskoliani ingerlanneqartumi, 377.000 koruunit immikkoortinneqarsimapput, inuillu 35-t isumasioqatigiinnermi ilaapput.
