Assi: KNR

Partiip Inatsisartut pikkorissartinniarai

Suleqatigiissitsisut Inatsisartunut ilaasortanngortussat inatsisartuni sulinissaminnut piareersimalluaqqullugit pikkorissartikkusuppaat.

Suleqatigiissitsisut isumaqarput Inatsisartunut ilaasortanngortussat innuttaasut inuunerat pillugu inatsisiliornissaminnut aningaasaqarneq pillugu ilisimasanik tunngaviusunik pigisaqartariaqartut.

Tamannalu pisortat suliffeqarfiutaanni siulersuisunut assersuuppaat, taakkunanimi siulersuisut pikkorissartinneqartarmata.

- Suleqatigiissitsisuni siunnersuutigilersaarparput, Inatsisartut annertuumik mikisumillu aningaasarsiornermut, aningaasarsiornermi tunngaviusumik taaguutinut tunngasunik taakkulu imaat pillugit kiisalu aningaasarsiornermut sunniutaasartut pillugit pikkorissarneqartalissasut, Tillie Martinussen partii sinnerlugu tusagassiorfinnut nalunaarutimini taama allappoq.

Apriilillu 24-ani qinersinerup kingorna Inatsisartunut ilaasortanngortut pinngitsooratik pikkorissartinneqartarnissaat sulissutiginiarpaa. Inatsisartullu ataatsimiinnerisa akornanni piffissaq pikkorissarnermut atorneqarsinnaasoq innersuussutigaat.

- Isumaqasioqatigiisitsisarnerit ilaannut qinikkat pinngitsooratik peqataasalernissaat aalajangersartariaqalinngilarput? Nunami aquttussaavarput aamma nunap aningaasarsiornera, Tillie Martinussen taama allappoq.

Isummersuutit