Partiinut tapiissutit pillugit siunnersuut tapersersorneqarluartoq

Ilanngutassiaq siunnersuutip aappassaaneerlugu oqaluuserineqarneranut paasissutissanik ilallugu nalunaaqutaq 13:41 nutarterneqarpoq.

Siunnersuut ullumi sisamanngornermi aappassaanneerneqassaaq, inatsisillu pillugit ataatsimiitaliami sisamanngornermi naalakkersuisuutitaqartut Siumut, Inuit Ataqatigiit Partii Naleqqallu partiivineersuinnarnik ilaasortalimmi tamakkiisumik taperserneqarpoq partiinut tapiissut 30 procentimik qaffanneqassasoq.

Tamanna nunap karsianut ukiumut koruuninik 2,8 millioneqassaaq,  inatsisillu pillugit ataatsimiitaliaq isumaqarpoq naalakkersuisoqarfinni Inatsisartunilu annermik allaffissorneqassasoq.

Illuatungiliuttut partiiata Demokratit siunnersuut isornartorsiorsimavaat erseqqissarlugu partiinut tapiissut 2009-mi marloriaat sinnerlugu qaffanneqarsimammat.

Siunnersuummut oqaaseqaatini allassimagaluarpoq tapiissut 2006-ip kingorna naleqqussarneqarsimanngitsoq.

Ataatsimiititaliaq isumaliutissiissummini allappoq paatsoortoqarsimasoq,  tassami missingersuusiornermut attuumanngitsumik partiinut tapiissut 2009-mi 2010-milu teknikkikkut  allannguisoqarsimasoq.

Oqallisigineqarsinnaavorli patiinut tapiissut ilumut qaffanneqarsimanersoq. 2009-mimi partiit imminnut aningaasaliiffigipput Inatsisartunit akilerneqartarsimagaluartoq namminneq isumagisariaqaleramikku, tamannalu inatsimmik uniuinertut isigineqarluni.

Isumagisassaq tassaasimavoq partiini siunnersortitut taaneqartartut akissarsiassaat, tamanna atuarneqarsinnaavoq 2009-mi siunnersuutigineqartumi.

- Partiini siunnersortit taamaalillutik Inatsisartut aqutsisoqarfiannit atorfinitsinneqarput taakkunanngali siunnersorneqarsinnaanatik. Nassuerutigisariaqarpoq taama aaqqissuussineq tapiisarnermut inatsimmik ingalaanerummat, soorlu aamma atorfinititsisarnermi ersarissunik ajornartorsiutitaqartoq, atorfilittat taamani allapput.

Allannguineq taamaalilluni nunap karsianut aningaasartuusiinngilaq, partiilli siunnersortitik sulisoriinnarsinnaavaat 2005-imili Inatsisartut allattoqarfiannit atorfeqartinneqarlutillu akilersorneqartut.

Inatsisartut allattoqarfiannit inatsisinut tunngasuni immikkoortortameersoq Kent Fridberg KNR-imut ima allappoq:

- Taamannak aaqqissuussisimaneq inatsisitigut ajornartorsiutitaqartoq 
politikkikkullu sulinermi tapiissutit pillugit Inatsisartut inatsisaatigut pisortat partiinut tapiissutaannik aqutsinissamik sanioqutaarinninnerusoq uppernarsarsinnaavara. 

Inatsisartut ilaqutaasa akeqanngitsumik angalasarnerisa ilaqqinnissaanik siunnersuut innuttaasunit akerliuffigineqarnerujussua pissutigalugu siusinnerusukkut tunuartinneqarpoq.

Demokraatit attaviitsorlu Michael Rosing kisimiillutik akerliummata, siunnersuut pingajussaaneerlugu oqallisigisassanngortinneqarpoq.

Partiinut tapiissutit pillugit siunnersuut pingajussaaneerlugu novembarip ulluiasa 14-ianni oqaluuserineqassaaq.