Partiinut tapiissutit 2,275 mio-nik katillugit qaffassapput

Partiinut tapiissutit katillugit 2 mio. 275.000 kr-nut qaffatsinneqarnissaanut, Demokraatit akerliugaluaqalutik, partiinut tapiissutinik qaffaanissap inatsisartuni aappassaaneerneqarnerani amerlanerussuteqartut akuerimmassuk, Demokraatit qaffaatinik atorluaanialerput.

Demokraatit siulittaasuat Per Berthelsen ima oqarpoq.

- Partiit annertusisarujussuarmik imminut aningaasaliiffiginiarnerat amerlanerussuteqartut ikinnerussuteqartut sallunaveequtitutut atorlugit, apeqquterpassuit akiumaneqanngitsut, silaannarmi erfatsillugit akuersaarpaat. Uagut illuatulingiliuttutut ikinnerussuteqartugut, ikiortissanik ilisimasalinnik aallersinnaanerput killeqarpoq, naalakkersuisuutitaqannginnatta, oqarpoq nangillunilu.

- Unammillersinnaassuseqassaguttalu partiinut tapiissutinik qaffaanerit atorluartariaqarpagut, atorluassallutigillu, taamaaliunngikkuttami illaruaataannanngussaagut. Assatik errortorniarlugit oqarput, piumasut tapiissutinut qaffaassutit tigussagaat, kisianni taamaanngilaq. Illuatungiliuttutut amerlanerussuteqartut pisinnaasaat soorunami aamma tunngavigalugit suleriaaserput ingerlattariaqarparput. Nukittunerusumik illuatungiliussinnaanerput, taakku aningaasat atorlugit inississinnaagutta taava taakku aningaasat atussavagut, Per Berthelsen naggasiivoq.