Partiinut tapiissutaasartut qaffarujussuarniarneqarput

Politikerinut partiinullu tapiissutaasartut qaffarujussuarniarneqarput. Siunnersuut Atassummit, Inuit Ataqatigiinnit Siumumillu siunnersuutaasoq, inatsisartuni ullumi saqqummiunneqassaaq. Politikkikkut suliaqartunut tapiissutaasartut naalakkersuisooqatigiit allanngortinniarpaat, partiit ukiumut 2 millioni koruuninik amerlanerusunik pisartagaqalersillugit.

Inatsisartunut ilaasortaq ataaseq ullumikkut 100.000 koruuninik partiimut tapiissuteqartitsisarpoq. Siunnersuut akuerineqassappat 125.000 koruuninut taanna qaffatsinniarneqarpoq. Partiit inatsisartunut ilaasortaatitaqartut tunngaviusumik tapiissummik 300.000 koruuninik pisalissasut aamma siunnersuutigineqarpoq.

Allannguisoqassappat politikerinut partiinullu tapiissutaasartut katillugit 2.275.000 koruuninik qaffassapput.

Siumut assersuutigissagaanni inatsisartuni qulinik ilaasortaatitaqartut, politikkikkut suliaqarnertik peqqutigalugu partiip ullumikkut ukiumut 1 millioni koruunit pissarsiarisarpai.

Siunnersuut akuerineqassappat Siumukkut ukiumut 550.000 koruuninik annerusumik tapiissutisisalissapput.