Partiinut aningaasat isertut anisullu tamanit takuneqarsinnaalernissaat inatsisartuni siunnersuutigineqarpoq

-Partiinut kattusseqatigiinnullu aningaasat isertut anisullu, kikkunnillu aningaasalersorneqarnersut tamanit takuneqarsinnaalertariaqartut, Demokraatit siulittaasuata Per Berthelsen-ip ullumi Inatsisartut ullut arfinilissaanni ataatsimiinneranni, Inatsisartut inatsisissaattut siunnersuutigaa.

Siunnersuummi qulaakkeerniarneqarpoq partiit kattusseqatigiilluunniit soqutigisaqaqatigiinnit naqisimaneqannginnissaat. Partiinut kattusseqatigiinnulluunniit 10.000 kronit sinnerlugit aningaasaliisut atii adresse-lu takuneqarsinnaalernissaat anguniarneqarpoq, aningaasaliissutilli ukiumut 10.000 kroninit minnerusut aamma takuneqarsinnaalernissaat anguniarneqarpoq. Siunnersuuteqartoq Per Berthelsen oqarpoq, aningaasat atorlugit politikkikkut suliaqartunik naqisimanninnginnissaq qulakkeernissaa anguniarneqartoq.

-Aamma aningaasaliisoqartillugu tamatuma nammineq piumassutsimik ingerlanera qulakkeerniarneqarpoq, Per Berthelsen oqarpoq.

Per Berthelsenip ilanngullugu oqaatigaa, suliffeqarfiit soqutigisaqaqatigiiffiit assigiinngitsullu illersorniarneqartut, taamatullu pisoqassagaluarpat pinngitsaalineqaqqunagit partiinut aalajangersimasunut tapiissuteqarnissaannut.

-Aamma anguniarneqarpoq soqutigisaqaqatigiiffiit partiinik nunatsinni politikkikkut suliaqartunik aningaasalersuinikkut naqisimannissinnaanissaat pinngitsoortinniarneqarnera, Per Berthelsen oqarpoq.

Demokraatinit siunnersuutigineqartoq Naalakkersuisut isumaqatigisinnaallugu akissuteqarput. Piumasaraalli soqutigisaqaqatigiinnut susassaqartunut allanullu tusarniaasoqaqqaarnissaa, aammalu partiit kattusseqatigiillu tusarniaavigineqaqqaarnissaat piumasaralugu.

Inuit Ataqatigiit isumaqarput 10.000 kronimut killigitinniarneqartoq 5.000 kroninut appartinneqassasoq. Siumut siunnersuummut aamma isumaqataasoq, partiip allattaa johannes Mathiassen ilisimatitsivoq. Atassutip inatsisartuini ilaasortai oqaaseqartitsisinnaasimanngilagut.