IA mittarfissuit pillugit Partiimi isumarpassuupput
Mittarfik massakkut 2200 meterinut tallineqassasoq, Avannaata Kommuneani kommunalbestyrelsemi ilaasortat IA-meersut oqarput. Ilulissanili mittarfiup maannakkuungitsoq, kisianni kingusinnerusukkut tallillerneqarsinnaanera, IA-p siunertaralugu nalunaarutigereernikuuaa.
AAMMA ATUARUK Mittarfissualiassat partiimik avissaartitseqqittut
- Partiitta iluani oqaloqatigiinnerit aasaq tamaat ingerlapput. Aamma isumarpassuit assigiinngitsut tusaaniarpagut. Aamma Bendtip oqarneratuut, tunngaviatigut partiitta iluani isumaqatigiippugut, Ilulissani mittarfik tallissaaq, uani tunngavigisarput tassaavoq 2200 meteriutinnagu assersuutigalugu 1500 imaluunniit 1799 taakkua toqqarneqassappata aningaasat isaasalerlugu sipaarutissat qassiuppat, IA-mi siulittaasoq Sara Olsvig oqarpoq.
Siuarsaanermut ajoqutaassasoq
Ilulissani mittarfiup inissimaffissaani nutaami tallilerneqarnissaa kissaatigalugu, IA-p oqariartuutigaa. Aallaqqaammulli 2200 meteriussanngilaq. Mittarfiulli kingusinnerusukkut 2200-mut tallillerneqarsinnaanera qulakkeerneqassasoq, siunnersuusiaminni saqqummiuppaat.
AAMMA ATUARUK IA: Nuummi mittarfik siulliunneqassaaq Kangerlussuarlu ineriartortinneqarluni
Mittarfik tallilerneqanngippat inuussutissarsiornermi siuarsaanermut, aalisarnermut takornariaqarnermullu ajoqutaassasoq, Avannaata Kommuneani Inuit Ataqatigiit ilaasortaasa oqaatigaat.
Ilulissanili mittarfik tallineqassasoq partiimi siulittaasup isumaqatigaa, kisianni aallaqqaammut 2200 meteriunani.
- Naalleraanerussooq mittarfik tallineqanngippat, uagut oqarpugut mittarfik tallineqassooq aamma siunissami suli 2200-minngaanniit tallineruneqarsinnaanngorlugu inissisimaffimmut nutaamut nuunneqariissooq.
