Mikael Petersenip kinguaassiutitigut innimiilliorsimanerarneqarnerminut unnerluussutit ilisarisinnaanagit siusinnerusukkut oqaatigaa. Toqqorsivimmit assiAssi: KNR

Partiimi allattaasimasoq kannguttaalliorfiginnittutut eqqartuussivimmi sassaassasoq

Siumup allatsigisimasaa ukiumi nutaami eqqartuussivimmut sassassaaq. Taanna arnap arnalluunniit qassiiusut nuluinik ilaatigut attuualarisarsimaneragaaalluni kannguttaatsuliortutut unnerluutigineqarpoq. Nammineq pinngitsuunerarpoq.

Nutartigaq: Mikael Petersenip Partii Naleqqami allattaanertut atorfeqarunnaarsimasoq  maanna erseqqissarneqarpoq.


Kissaatiginngisamik attuinerit kinguaassiutinullu tunngasunik oqalunneq.

Siumumut allattaasimasup Mikael Petersenip eqqartuussivimmut sassarnissaanut tamakkua qitiupput.

Taanna pisuni katillugit sisamani arnamut arnanulluunniit qassiiusunut kannguttaalliorfiginninneragaalluni unnerluutigineqarpoq. Tamanna unnerluussummi KNR-ip takunnissinnaaffigisaani allassimavoq.

Matumani Mikael Petersenip 2013-imit 2018-imut arnap arnalluunniit qassiiusut nuluisigut attualaarisimaneragaasoq pattalaarisimaneragaasorluunniit allassimavoq.

AAMMA ATUARUK qBlev anklaget for krænkelser: Mikael Petersen er meldt til politiet

Arnat iviangii kuglepenimik aamma kivissimagai qasseriarlunilu arnat kannguttaatsuliornertut misigisaanik oqaaseqarsimasoq allassimavoq.

Assersuutigalu arnap ataatsip qassiiusulluunniit iviangii sigguilu oqaaseqarfigisimagai aamma arnamut ataatsimut ”Aammalu taannaaraq (aqqa isertuussaq, aaqq.) tunuaneerlugu qanormita ippa", unnerluussummi allassimavoq.

Pisut sisamat assigiissutigaat tamarmik Siumup Nuummi allaffeqarfiini pisimasuuneragaapput.

Mikael Petersen pinngitsuunerartoq

Pisut qassiiusut Siumumi assigiinngitsunik atuuffeqarsimasup Mikael Petersenip Siumumut allattaanerani pisimaneragaapput.

Arnat qulit Siumumut atttumassuteqartut Mikael Petersen innimiilliorsimanerarlugu februaarimi unnerluutigaat. Arnat qassiiusut – Aki-Matilda Høegh-Dam taakkununnga ilaalluni – kingornatigut tamanut saqqummerput.

AAMMA ATUARUK Mikael Petersen: Jeg kan ikke genkende snak om sexchikane

Siumumi atorfeqarsimasoq nammineerluni pinngitsuunerarpoq. Taassuma pisimasut unnerluussummi allaatigineqartut ilisarisinnaanagit oqarpoq.

- Eqqartuussivimmi suliarineqalernera nuannaarutigaara, suliamut atatillugu aalajangiisoqassammat. Allamik oqaasissaqanngilanga, taanna KNR-imut oqarpoq.

Arnat aqqi unnerluussummi ersigunnaarsinneqarsimapput. Taamaammallu arnat qassit pineqarnersut paasineqarsinnaanani. Mikael Petersenip KNR-imit aperineqarami unnerluutigineqarnini itinerusumik oqaaseqarfigerusunngilaa.

Siumup siulersuisuunerisa partiip allatsigisimasaata sulisussaajunnaartinneqarnissaa februaarimi aalajangerpaat, taannali tamatuma kingorna nammineerluni soraarpoq.

Mikael Petersen qaammatit marluk qaangiuttut atorfiup assingani partiimili allami, tassa Partii Naleqqami, atorfinissimavoq. Partii Naleqqamili maanna atorfeqarunnaareerpoq.

Suliaq eqqartuussivimmi aappaagu januaarip ulluisa tallimaanni suliarineqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat