Partii nutaaq pilersinniarneqarpoq

oktobarip 29-at 2005 16:58

Apriilip qaammaataani kommunalbestyrelsimut qinersereernerup kingorna Aasianni Inuit Ataqatigiit avissaartuupput.

Aasianni Inuit Ataqatigiit amerlanerussuteqarluaraluarput, avissaartuutilernerulli kingunerisaanik ilaasortat pingasut Inuit Ataqatigiinnit tunuarput, Inuit Ataqatigiillu sinnerlugit ilaasortaasimagaluartoq Enok Sandgreen Siumut Atassutikkullu suleqatigalugit borgmesterinngorluni.

Enok Sandgreenilu partiimik nutaamik pilersitsinialerpoq:

- Oqaatigissavara pingasuulluta Inuit Ataqatigiinniit anisimasugut nutaajusumik suleqatigiiffeqarluta maani kommunemi, taannalu Saamerlernik atsersimavarput, Enok Sandgreen oqarpoq, nangillunilu: - Partiinngorniarnissarput eqqarsaatersuutigaarput. Suliaqarpugut. Innuttaasut sanngiinnerusut katataanerillu pitsaanerusumik sullikkumavavut.

Saamerliit isumaqarput assigiimmik akeqartitsinerup atorunnaarsinneqarnera isorliunerusunut eqquisoq, inuuniarnerullu oqimaatsunngorsimanera.

Enok Sandgreenip saniatigut Peter Frederik Gedionsen aamma Leo Rosing Inuit Ataqatigiinni ilaasortaajunnaarput, attaviitsunngorlutillu.