Partii nutaaq pilersinneqartussanngorpoq
![](/sites/default/files/styles/image_934x467/public/article_images/greenland_001_ilorpiatta_akisunnera.jpg?itok=bD6F2EyD)
Partiimik nutaamik pilersitsiniartoq, Nikku Olsen, isumaqarpoq nunatsinni saamerliuniartumik maannakkut parteeqanngitsoq.
- Inuit Ataqatigiit paartiitut saamerliuniartutut imminnut pisaraluarput, partiili aningaasaatilissuarnut maannakkut illersuisuuvoq, taamaattumik innuttaasut pissakinnerusut maannakkut illersorneqarneq ajorput, Nikku Olsen erseqqissaavoq.
Partiissaq isumaliortaatsinut nutaanik pingaartitsisunut pingaartumillu inuiattut namminiussuseqarluni ingerlatserusuttunut aamma saaffiginnituuvoq.
- Ilaqutariinnermut toqqissisimanartumut pingaartitsisunut, inuiattullu kikkuunitsinnik pingaartitsisunut tikilluaqqusivugut, Nikku Olsen oqarpoq, erseqqissaallunilu partiissap tunngavippiassai maannakkut suli avammut saqqummiunneqarsinnaanngimmata.
Partiimik pilersitsiniartup pilersaarutigaa partii pilersinniarlugu oktobarimi ataatsimeersuartoqassasoq. Aatsaat partiinngortitsisoqarsinnaavoq innuttaasunit 920-it atsioqataasinnaappata.