Partii nutaaq Fokus Danmarkimi pilersinneqarpoq
Christian H. Hansen Dansk Folkepartimit ukioq januaarimi anivoq februaarimilu qaammatini 14-ini napparsimanini pillugu sulinngiffeqareerluni Folketingimut uteqqilluni. Tassali maanna partiimut allamut nuunniarani partiimilli nutaamik pilersitsiniarluni aalajangernini aatsaat tamanut tusarliullugu.
Danmarkimi radioaviisip programmit sisamat pissarsiarai, taakkunani Christian H. Hansenip anguniagassani annerpaat marluk taavai, aammattaaq januaarip 21-anni Jersild Livemi taasani:
"Tassaaput uumasut atugarissaarnissaat inuiaqatigiinnilu sanngiinnerusut isumagineqarnissaat".
Uumasut uumasuutigineqarnerisa nerisassanngortinneqartarnerisalu akornanni oqimaaqatigiinnerunissaq aamma avatangiisit pinngortitallu mianersuunneqarnissaat kissaatigaarput, programmimi nutaami taama allassimavoq.
Aammattaaq nunat illoqarfiillu akornanni oqimaaqatigiinneqassaaq, taamaalillutik nunami immikkoortortat puigorneqassanatik. Peqqinnissamut, atornerluinermut pinerluttuliornermullu tunngatillugu pinaveersaartitsinerup peqqinnissallu akornanni oqimaaqatigiinneqassaaq.
Inuiaqatiginni sanngiinnerpaanut tunngatillugu Christian H. Hansenip napparsimmavinni tarnikkut napaatinik sullissinermi utoqqarnillu isumaginninnermi qanilaartuunissaq piumasaraa, DR allaaserinnippoq.
