Partii Naleraq: Danmark akisussaaffimmik tigusisariaqarpoq

Nunatsinni meeqqat amerlavallaat kinguaassiutitigut kannguttaatsuliorfigineqartarnerisa pinngitsoortinniarneqarnissaat eqqarsaatigalugu danskit naalagaaffiat aningaasaliisariaqartoq, Partii Naleraq isumaqarpoq.

- Meeqqat kinguaassiutitigut kannguttaatsuliorfigineqartarneri pitsaanerusumik akiorneqassappata, Nunatsinni politiit amerlineqartariaqarput pinngitsoortitsiniarnerlu eqqarsaatigalugu politiit paasititsiniaanermik suliaqartariaqarlutik, Partii Naleqqap siulittaasua, Hans Enoksen, taama oqarpoq.

Nunatsinnili politiit pisortaa, Bjørn Tegner Bay oqarpoq, meeqqat kinguaassiutitigut kannguttaatsuliorfigineqartarnerat pillugu paasititsiniaanerit politiinit akisussaaffigineqanngimmat, Partii Naleraq tamanna pillugu isumaqatiginagu.

- Meeqqat kinguaassiutitigut kannguttaatsuliorfigineqartarnerat pillugu paasititsiniaanissaq politiit isumagisassarigaat Partii Naleqqamit isumaqarfigineqarpat tamanna isumaqatiginngilara, Nunatsinni politiit qullersaat, Bjørn Tegner Bay oqarpoq.

Aamma atuaruk Søren Espersenip siunnersuutaa Martha Lund Olsenip akuerinngilaa

Meeqqat kinguaassiutimikkut kannguttaatsuliorfigineqartarneranni politiinit sakkortunerusumik suliniuteqartariaqartut, Hans Enoksen isumaqarpoq imalu oqarluni.

- Pinerliineq pisimappat politiit piaarnerpaamik akuliuttussaapput. Isumaqarpungalu politiit pinerlutsitsinaveersaarneq eqqarsaatigalugu suliniuteqartariaqarlutik. Tassami pissutsit taama ilungersunartigisut pinngitsoortinneqarniartariaqarmata. Taamaattumik naalagaaffik amerlanerusunik aningaasaliisariaqalerpoq, Hans Enoksen oqarpoq.

Nunatsinni politeeqarfiup pisortaata, Bjørn Tegner Bayip naqissuserpaa, pitsaaliuinermik suliaqarneq inunnik isumaginnittoqarfiit suliassarimmassuk, tamannalu oqartussaqarfik 2009-mi Nunatsinnit oqartussaaffigineqalersimasoq erseqqissarlugu.

 

Inunnik isumaginninnermut tunngasut politiit suliassarinngilaat

Taamatut oqareerluni Bjørn Tegner Bay nangilluni oqarpoq, pitsaaliuinermik suliassat Namminersorlutik Oqartussanit kommuninillu suliassaasut.

- Soorunami pitsaaliuinerit politiinit aamma suliassaapput taamaattorli inunnik isumaginnittoqarfinnut paasissutissiinikkut tamanna pisarluni. Taamaattumik erseqqissaatigissavara pitsaaliuinerit politiinit suliassaanngimmata, Bjørn Tegner Bay oqarpoq.

Naak taanna taama oqaraluartoq, taamaattoq Hans Enoksen isumaqarpoq, politiit aamma akisussaaffeqartut aamma pinerliisoqarsimatillugu paasiniaasarnerit erngertumik aallartinneqartariaqartut oqarluni.

- Nunaqarfippassuarni politiit kiffartuussinerat killeqartorujussuuvoq, sulisussat aningaasallu amigaatigineqarmata. Taamaammat meeqqat pitsaanerusumik illersorneqassappata taava pinerluttaalisitsineq annerusoq sakkortunerusorlu, danskit naalagaaffiannit maanna akisussaaffigineqartoq nukittorsarneqartariaqalerpoq, Hans Enoksen oqarpoq.

 

Politiit sulinerat pitsaalluinnarpoq

Amerlanernilli naalagaaffik aningaasaliissagaluarpat tamanna politiit pitsaanerusumik suliaqalernerannik kinguneqarnavianngitsoq, Bjørn Tegner Bay oqarpoq erseqqissaatigalugulu meeqqat kinguaassiutimikkut kannguttaatsuliorfigineqartartut pillugit politiit maanna suleriaasiat pitsaalluinnarmat.

- Meeqqat kannguttaatsuliorfigineqartarneri allatulluunniit innarlerneqartarneri eqqarsaatigigaanni, tamakku politiinit salliutinneqartarput. Tamannalu aningaasaliiffigineqarnerussappat tamassuma pitsaanerusunngortinneqarnissaa ilimananngilaq, Nunatsinni politeeqarfiup pisortaa, Bjørn Tegner Bay taama oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat