Partii Naleraq akerliussutsimik takutitsiniartoq
Nunatsinni mittarfiliortiternissamut atatillugu danskit oqartussaasuisa akuliunnerat pissutigalugu, Partii Naleraq akerliussutsimik takutitsinissamut aggersaavoq.
Kim Kielsen, Lars Løkke Rasmussen
Allattoq Nûno Isbosethsen, Anton Gundersen Lihn
septembarip 10-at 2018 11:44
Danskit ministeriunerata Lars Løkke Rasmussenip Naalakkersuisullu siuliitaasuata Kim Kielsenip ualimut atsioqatigiinnissaat akerleralugu Partii Naleraq akerliussutsimik takutitsiniarluni nalunaaruteqarpoq.
- Nunarput tuninianngilarput! Peqataagisi, Partii Naleraq facebookkimi taama allaaserisaqarpoq. Akerliussutsimik takutitsineq Inatsisartut ataatsimiittarfiata silaataanit nal. 13.00-imit ingerlanneqassaaq, ingerlaaqatigiillu atsioqatigiiffissap tungaanut, tassa Hans Egedep illuata tungaanut, ingerlaaqatigiissasut ilanngullugu nalunaarutigineqarpoq.
Partii Naleraq akerliussutsimik takutitsinissamut akuersissummik politiinut qinnuteqarput, taamaalillutillu akuersissut utaqqiinarlugu.
