VIDEO Partii Naleqqap sulissutigerusutaa: Inuussutissanik imminut pilersornerunissaq
- Kapuutit atorlugit allisakkat allallu nunatsinnut eqqussorpagut. Tamakku peqqinnanngillat, peqqinnarnerusunik peqarnerput tulluusimaarutigalugillu atorluartariaqalerpagut, Partii Naleqqami siulittaasoq, Hans Enoksen taama isumaqarpoq.
Nerisassanik eqqussuinerit annikillisarniarneqarput
Taamaalilluni aamma avataaninngaanniit eqqussortagarpassuagut assartuinerlu akisoqisoq ilanngullugu akilersortakkagut, taakku annikillisinneqarsinnaappata, taava nunatsinni nunallu tunniussinnaasai tamakkiisumik atorneqarsinnaalissapput, taannalu aamma aningaasarsiornikkut annertuumik kivitseqataasinnaasoq takusinnaavaarput.
Kalaalimineerniarfiit amerlineqarnissaat pioreersullu ineriartorteqqinneqarnissaat Partii Naleqqap sulissutigisassatut siunniuppaat. Pisortallu suliffeqarfiutaat kalaaliminernik pisinerusalernissaat aqqutissiuukkusuppaat.
- Meeqqeriviit, utoqqaat illui, napparsimmaviit, ilinniartut najugaqarfii, Namminersorlutik Oqartussat suliffeqarfiutaa akunnittarfiillu pisussaaffilerneqartariaqarput inuiaqatigiinni nammaqataaqqullugit, taamaaliornikkut uatsinnut pilersornerulernissarput aamma qanilliartorsinnaagatsigu, Hans Enoksen oqarpoq.
Tuttunik umimmannillu nussuisoqarsinnaanera sulissutiginiaraat
- Sumiiffiit ilarpassuini taakku piniarneqarsinnaanngorlutillu iluaqutigineqarsinnaanerat aqqutissiuunneqartariaqarpoq, Hans Enoksen taama isumaqarpoq.
Nunatsinni nersutaatit amerlineqarnissaannut periarfissat aamma misissugassatut ilaattut taakkartorneqarpoq.
Narsaasiornikkut, uumasuuteqarnikkut, nersussuaateqarnikkut, kukkuujuteqarnikkut puulukiuteqarnikkullu periarfissat misissorneqartariaqarput, taamaalilluta avataaninngaanniit eqqussukkagut maani nammineerluta suliarisinnaanngorniassagatsigit, Hans Enoksen naggasiilluni taama oqarpoq.
