Assi: Ivik Kristiansen/KNR

Partii Naleqqap qinigassanngortitai takukkit

Nunatsinni partiini nutaajunerpaaq, Partii Naleraq,folketingimut pikkussatik marlunnik marluk sassartippaat. Aappaa tupallannanngitsutut taaneqarsinnaasoq tassaavoq Inatsisartuni ilaasortaq Per Rosing-Petersen.

Partii Naleqqap folketingimut qineqqusaartussai marluk tassaapput Inatsisartuni ilaasortaq Per Rosing-Petersen aamma Dan Rasmussen. Per Rosing Petersenip folketingimut qineqqusaarutini pingaarnerit marluk ersersinniarpai.

- Qineqqusaarutigut pingaarnerpaat tassaapput nammineq oqaatsitsinnik folketinngiminngaanniit ilitsoqqussaralugu oqaatsitsinnik atuisinnaanissaq. Aamma Danmarkip ukiorpassuarni Nunarput iluaqutiginerpaallugu atorsimaneranut, akitsuummik taallugu, tapiissutinik taarsiullugu akitsuummik taanna nutaatut aaqqissuussisoqarnissaanik piumasaqarnissarput, naalagaaffeqatigiikkallartilluta piumasariniarparput, Per Rosing-Petersen taama oqarpoq.

Partii sinnerlugu qineqqusaartup aappaa Dan Rasmussen 40-nik ukioqarpoq nuummilu Royal Arctic Linemi immikkut assartuussinermi sullissisuulluni.

Taanna Partii Naleqqamut sapaatip akunnera kingulleq ilaasortaalerpoq, aatsaallu qineqqusaalerluni.

Sakkutooqarfinni kalaallit inuusuttut ilinniagallit amerlisinniarlugit sakkutuujusussaaneq Nunatsinni atuutilersinniarlugu, Dan Rasmussenip immikkut sulissutiginiarpaa.

- Allaffissornermi tunngasut, ilisimatusarnermut tunngasut, ilinniartitsisunngorniat ilaalu ilanngullugit pigereerpagut. Ukua sakkutooqarfinni kalaallit inuusuttut ilinniartartut ikitsuararsuupput, Partii Naleraq sinnerlugu folketingimut qineqqusaartoq, Dan Rasmussen oqarpoq.

Partii Naleraq folketingimi qinigaatitaqalissaguni Danmarkimi partiit talerperliit saamerliilluunniit arlaat pituttorfiginagit sulissallutik nalunaarput.

- Isertitaqarutta Kalaallit Nunaat tamaat sullissavarput, Kalaallit Nunaatalu iluaqutaanerpaaffissaani akuersisoq, talerperliugaluarpata saamerliugaluarpataluunniit tapersersorumaarpagut, Per Rosing-Petersen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat