Assi: KNR

Amerlanerussuteqartut Nikkulaat tatiginngikkaat: Partii Naleqqap naalakkersuisoq aamma tatiginngilaa

Inatsisartuni amerlanerussuteqartut aalisarnermut, piniarnermut nunalerinermullu naalakkersuisoq, Nikkulaat Jeremiassen tatiginngilaat. Partii Naleraq naalakkersuisumut tatiginninnani maanna nalunaaruteqarmat tamanna erserpoq.

Nikkulaat Jeremiassenip assortortunik nalunaaruteqarsimanera akuersaarneqarsinnaanngitsoq Partii Naleqqameersoq Jens Napaattooq isumaqarpoq.

- Taamatut marloqiusamik inissittoqarnera tatiginanngitsumik inuiaqatigtiinnut puupassaarutaasumik minnerunngitsumik avammut kiinnertarnitsinnut innarliisinnaanera eqqarsaatigalugu aamma tatiginnikkunnaarnermik oqariartuutitsinni toqqammavilersuutigivarput, Jens Napaattooq oqarpoq.

Pisoq naatsumik oqaluttuaralugu: 
- Sisamanngorneq 28/3: Inuit Ataqatigiit Naalakkersuisumut Nikkulaat Jeremiassenimut tatiginnikkunnaarnermik taasititsinissamik siunnersuuteqarput. Taanna aalisapiluttoqarneranik tusagassiorfinnut oqarsinnarluni politikerinut allatut nassuiaateqarsimanerarpaat. 
Naalakkersuisup tatiginnikkunnaarnermik taasititsinissaq anigorpaa. 
- Tallimanngorneq 29/3: Aalisarnermut, Piniarnermut Nunalerinermullu ataatsimiititaaq Naalakkersuisumik isornartorsiuilluni marlunnik tusagassiorfinnut nalunaaruteqarpoq ilaasortat ilaannit atsiukkanik. Nalunaaquttap akunnera ataaseq qaangiummat tusagaasiorfinnut nalunaarutit utertinneqarput allanillu taarserneqarput assinganik imalinnik, tamatumuunali ilaasortanit atsiorneqaratik. 
- Ataasinngorneq 1/4: Aalisarneq pillugu ataatsimiititaliami siulittaasup, Henrik Fleischerip apersorneqarluni nassuerutigaa tusagassiorfinnut nalunaarutinut tunngatillugu kukkusimalluni. Ataatsimiititaliap Naalakkersuisumik isornartorsiuinini attatiinnarpaa, Naalakkersorlu tatiginerlugu isummernissaminnut akissuteqarnissaa utaqqillugu. 
- Pingasunngorneq 3/4: Naalakkersuisup Nikkulaat Jeremiassenip KNR-imit apersorneqarluni oqaatigaa qaleralinnik aalisapiluttoqarnera §37 naapertorlugu akissuteqaammi oqaatigisimallugu,  namminerli  oqaatigisimanngisaannarlugu

Partii Naleraq naalakkersuisumut tatiginninngitsunut ilanngummat inatsisartuni qinikkat 17-it, tassalu amerlanerussuteqartut, Nikkulaat Jeremiassenimut tatiginninngillat.

AAMMA ATUARUK Aalisarnermut naalakkersuisoq tatiginngilarput

Inuit Ataqatigiit Demokraatillu aalisarnermut naalakkersuisumut tatiginninnatik siusinnerusukkut nalunaarutigereerpaat.

Nikkulaat Jeremiassen piffissami kingullermi ajornartorsiortorujussuuvoq. Aalisapilunneq pillugu tusagassiuutinut politikerinullu assortortunik nalunaaruteqarsimasutut isornartorsiorneqarpoq. Aalisarnermut ataatsimiititaliap nassuiaatit ippigai, ataatsimiititaliallu ilaasortaasa Nikkulaat Jeremiassenimut tatiginnikkunnaarlutik sapaatit akunnerisa siuliata naanerani nalunaarutigaat.

AAMMA ATUARUK Ataatsimiititaliap Nikkulaat Jerimiassen tatigiunnaaraa

Suliarlu suli annerulinnginniassammat, Naalakkersuisut siulittaasuat, Kim Kielsen, iliuuseqartariaqalertoq, Jens Napaattooq isumaqarpoq.

- Kim Kielsen uani pineqartut tujormisikkunnaarlugit aalajangiisariaqarpoq piaartumik, taamatut tujorminartumik inissisimanerat pavani inersuarmi tujorminartumik qaqillugu aaqqinneqanngikkaluartoq piaartumik nammineq aaqqiiffigisariaqaraa isumaqarpugut, Jens Napaattooq oqarpoq.

Naalakkersuisut siulittaasuat, Kim Kielsen, Siumullu Inatsisartuni gruppiata siulittaasua, Karl-Kristian Kruse apersorniaraluarpagut kisianni oqaaseqarusunngillat.

AAMMA ATUARUK Aalisarnermut naalakkersuisoq ataatsimiititaliamit isorineqartoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat