Partii Inuit uranimut naaggaarluinnarput

Partii Inuit uranimut tunngatillugu isumaat tusagassiuutini oqallisaasupilussuuvoq. akuersaanngilluinnarnissamik politikkip akllanngortinniarneqarnerani pilliuteqartariaqarsimasorineqaraluarput, partiimilli pilersitsisup Nikku Olsenip tamanna maanna ilumuunnginnerarpaa.

-Partii Inuit uranisiornissamik naaggaartuunertik aalajangiusimavaat, aalajangiusimasuassallugulu kikkunnulluunniit, pinngortitamut, uummassusilinnullu tamanut isumannaateqanngittumik piiarneqarsinnaaneranut atatillugu uppernarsaammik sumilluunniit pisimasoqartinnagu. Partii Inuit aatsitassarsiorniarnerit suulluunniit mattutinngilaat, taamaattorli isumannaatsuunissamik, avatangiisinut sunniutissanik, peqqissutsimut uummassuseqarnermullu tamanut qulanaareqqaartarnissaq pingaartitarilluinnarlugu, Partii Inuit siulersuisuuneri tusagassiorfinnut nalunaarutiminni taama allapput.