Partii Inuit siulittaasortik tunuartitaasoq taperserpaat
Tamanna Partii Inuit tusagassiorfinnut nalunaarummi takkajaami naqissuserpaat.
Qinigaanerup misilinneqarnissaanut ataatsimiititaliaagallartup Partii Inuit siulittaasuata Nikku Olsenip qinigaasinnaatitaanngitsutut aalajangiisimanera siulersuisut nalorninartortaqartutut isigaat.
Inatsisartut matoqqasumik ataatsimiillutik Nikku Olsenimik qinigaasinnaajunnaarsitsinerannit paasissutissanik pissarsiassaqarpallaanngilaq, partiilli siulittaasua oqaluttuarpoq 2005-imi arnaatiminik isassisimanini pissutaasoq.
Tamanna eqqartuussinertaqanngitsumik isumaqatigiissuteqartoqarneranik kinguneqarpoq akiliisinneqarluni, taamaalillunilu suliap eqqartuussivikkoortinneqarnissaa pinngitsoortillugu. Nikku Olsenilu malillugu suliaq 2008-mi matuneqarpoq.
Partiip suliaq sorujussuartut isiginngilaa, taamaattumillu siulersuisut siulittaasup Inatsisartunit anisitaanera akuersaaruminaatsillugu.
Demokraatit siulittaasuat arfininngormat oqarpoq Nikku Olsen pillugu suliaq inuiaqatigiinnut nikanarsaanerusoq.
- Taqmat oqartussaaqataanerannut kusanaatsuliornertut isigilluinnarpara. Qinigaasinnaatinnaani ilisimaaralugu partiimik pilersitsisinnarluni qinigassanngortittoqarsinnaanngilaq. Partii Inuit Nikku Olsenilu qinigassanngortissimanngitsuuppara qinersinerup inernerata allatorluinnaq isikkoqarsimagaluarpoq. Aamma Nikku Olsen qinigassanngortissimanngitsuuppat partii taama tapersersorneqarluartigisimanissaa ilimaginngilara.
Tamannalu Partii Inuit siulittaasuata tulliata aappaata tusagassiorfinnut nalunaarummik nassitsisutut atsiortuusup paasisinnaanngilaa.
- Inatsisartut suliaq pillugu ilisimatippagut, aamma Demokraatit, tassanilu suliap qinigassanngortinneranut sunniuteqarnissaa ilisimasimasuugutsigu siulersuisunit Nikkup qinigassanngortinnissaa akuerisimanaviarnatigu erseqqissarparput, Inatsisartunut qinigaaqqammersoq allappoq nangillunilu:
- Partii Inuit siulittaasorput tamakkiisumik tapersersorparput aammalu minnerpaamilluunniit apeqqusernatigu.
Allagaqaammittaaq allassimavoq Nikku Olsenip pisoq ajuusaarutigaa, taamatullu nassueruteqarnera pingaaruteqartupilussuusoq, tamannami ingerlaqqinnissamut periarfissiimmat.
- Taamaammat Partii Inuit suliaq unissutiginavianngilaa, inuiaqatigiillu inuiannut kalaallinut pitsanngorsarnissaanik sulinertik ingerlateqqinniarlugu, taama nalunaarut quppernerit aappaa avillugu takitigisoq naggerserneqarpoq.
Danmarkimi assingusumik pisoqaraluarpat qanoq iliortoqartarnersoq KNR-ip maannakkorpiaq misissuiffigaa, politikerimmi eqqartuussaasimanani qinikkatut sulinissamut naleqqutinngitsutut naliliiffigineqarsinnaanera paasiuminaatsinneqarmat.
Nikku Olsen suliaq pillugu oqaaseqaqqikkusunngilaq, partiimili tusagassiorfinnut allagaqaataanut innersuussilluni, aamma partiimik pilersitsisup pinerluttulerinermi nalunaarsorsimaffimmit paasissutissat imminut tunngasut tunniukkusussimanngilai, naak taamaaliornikkut ajortuliorsimanerminik nalornissutigineqartut tamaasa peerneqarsinnaagaluartut.
