Partii Inuit naalakkersuisooqatigiinnit peqataajunnaarput
Tusagassiortunik tuaviortumik aggersaalluni Naalakkersuisut siulittaasuata nalunaarutigaa Partii inuit ingerlaannartumik naalakkersuisooqatigiinnit tunuartut.
Allattoq Peter Troelsen, Simon Uldum
Uranimut apeqqut pissutigalugu partiip Atassummik Siumumillu suleqarnini unitsippaa. Partii Inuit naalakkersuisooqatigiit uranimut akuersaanngilluinnarnerup atorunnaarsinneqarnissaanik aalajangermatali partiip iluani avissaaqqasoqarsimavoq. Tamatuma kingunerisaanik partiip Inatsisartunut ilaasortaatituaa Randi Broberg partii sinnerlugu oqaaseqarsinnaatitaasimanngilaq. Kingullermillu Partii Inuit sinnerlugu Kim Kielsen Siumumeersoq oqaaseqartartuusimavoq, uranimut tunngatillugu apeqqutinut akuersaartumik oqaaseqartartoqarniarluni.
Miiti Lyngep ineqarnermut naalakkersuisutut kimit taarserneqassanersoq suli ilisimaneqanngikkallarpoq.