Partii Inuit kommunimut qinersineq kinguarteqquaat
Nikku Olsen partiit siulittaasuinut Naalakkersuisunullu ammasumik allagaqaateqarluni taama allappoq.
- Maannaakkut inatsisartunut qinersinialeriataarnitta takutippaa kommuninut qinersinissamut piareersaleruttorneq annertuumik unikaallatsinneqartoq, minnerunngitsumik partiit suli inatsisartunut aammalu naalakkersuisunngortitsinissanut tunngasunik ulapputeqarniaasaartut kommuninut qineqqusaartitsinerit aallartinneqartussat assut puullaaqitsitsissapput, Nikku Olsen isumaqarpoq.
Partii Inuit allanit ilalerneqanngillat. Olga P. Berthelsenip Nikku Olsenimut erseqqissaassutigaa Inatsisartunut qinersisoqarnera pissutigalugu naalakkersuisut aalajangiisinnaatitaanngitsut nunatsinnilu inatsisiliorneq atuuttoq malinneqartariaqartoq.
Demokraatittaaq tungaannit Nikku Olsen kaammattuutaa ilalerneqanngilaq. Anda Uldumip Nikku Olsenimut erseqqissaassutigaa qinersineq pillugu inatsimmi § 7, imm. 2, kommunimut qinersinerup kinguartinneqarsinnaaneranik periarfissiinngitsoq.
Hans Pavis Egedep IA qullersaaneersoq toqqaannarluni oqaatigaa saaffiginnittorluunniit akisariaqanngikkaluartoq, inatsisaatsuunnginnatta.
Partii Inuit kommunimut qinersinissamik kinguartitsisoqarnissaanik siunnersuutaa taamaalilluni kikkunnilluunniit ilalerneqanngilaq.
Kommunimut qinigassanngortinnissamut nalunaarfissaq kingulleq aqaguuvoq.