Partii Inuit Kalaallit Nunatsinni Sulisoqarnermut atorfinitsitsisarnermullu aqutsisoqarfimmik pilersitserusupput
Tamannalu aamma Partii Inuit eqqummaariffigilluinnarpaat, taamaattumillu politikkikkut suliassat pingaaruteqarluinnartut pillugit tunngavissanik Kalaallit Nunatsinnut tulluarsakkanik ilusiliinissamut piffissaq tulliuttoq Inatsisartutigut sulissutigissavaat.
-Partii Inuit atorfinititseriaaseq QITIUSUMIK kalaallinik aqunneqartoq "HR-Greenland", inuit pisinnaasaat aallaavigalugit Kalaallit Nunatsinni sulinikkut naleqqussaanissami politikkikkut ersarissumik suliniuteqarput, Partii Inuit tuisagassiorfinnut nalunaarummi allapput.
Ullutsinni Pisortat suliffeqarfii tamarmik immikkut HR-sulisoqarnermik aqutsisoqarfik (atorfilittanik nakkutilliivik) taasamik Dansk'inik aqunneqartunik immikkoortoqarput. Tamatumunngalu atatillugu Partii Inuit Kalaallit Nunatsinnut inuinullu kiffartuussinermi malunnaatilimmik allanngortinneqarnissaanut ima takorluugaqarpugut, Partii Inuit allapput.
- Partii Inuit ilaatigut sulissutigerusutaat tassaapput Inuusuttut 16-23-nik ukiullit maangaannartinneqannginnissaat, Suliffimmik misiliisunik nakkutilliineq, Atorfilinnik tapersersuineq tamakkiisup pilersinneqarnissaa, Qaffasinnerusunik ilinniartut (nunarsuaq tamakkerlugu) malinnaaffigineri, Qaffasinnerusunik ilinniartut pisortat suliffeqarfiini sungiusarnissaanik ataavartumik qulakkeerineq, atorfiit inornanngitsumik nunaqavissunik inuttalernissaat, Pikkorissaanerit & nalimmassaanerit nakkutiginissaat, Atorfinititseriaaseq Nunatsinni piviusunut naleqquttoq, Ilinniartunik & Qullersanik pikkorissaaqqinnermi ilisimasat pigiinnarnissaat, Nunat allat suliffeqarfii qanimut pikkorissaanermut suleqatiginissaat, Pisortat ingerlatsiveqarfiini taarsiiartuaarnermut Kalaallinik nunaqavissunik ilinniartitsineq aallartinneqassaaq.
