Politikki

Partii Inuit anguniagassaminik qinigassanngortitassaminillu saqqummiussivoq

Nunatsinni partiit nutaajunersaat saamerliunerpaartaallu, Partii Inuit, qinersinermi anguniagassanik siullerpaamik saqqummiussaqarpoq, tassanilu inissaaleqinermut tunngasut, inuussutissat pillugit inatsisiliorneq suliniutillu angisuut pillugit inatsisip aqqutissiuunneqarnerata isorinera pingaarnertut sammineqarput.

Allattoq Peter Troelsen, Simon Uldum

februaarip 08-at 2013 13:38

Nunatsinni partiit nutaajunersaata kalaallisuinnaq qineqqusaarniarnera ikitsuinnaat tupaallaatigissagunarpaat. Ersarinnerpaamik isummersorsinnaajumalluni taamaaliortoqarniarpoq. Tamatuma saniatigut Partii Inuit qinersinermi anguniagassatut suliniutissaat assigiinngisitaarput.

- Ukiuni qaangiussortuni inuiaat kalaallit illoqarfinniuppat nunaqarfinniuppalluunniit suusupagineqarnerat ersarissiartuinnarsimavoq, tamatumalu nassataraa sumiiffippassuarni inuttut atukkat ajorseriarsimanerat, suliffissaaleqinerujussuaq inissaaleqinerujussuarlu annertuumik takussaalersimallutik, allaat kalaaleqaterpassuatta qallunaat nunaannut qimarrannerannik tamanna kinguneqarluni, partiip siulittaasua Nikku Olsen allappoq.

Nunatsinni partii naalakkersuisuutitaqartarsimasoq Siumut assingalugu Partii Inuit suliniutit angisuut pillugit inatsit kikkut tamat oqartussaaqataanerat tunngavigalugu suliarineqartariaqarsoralugu isornartorsiuipput.

-Suliassanut angisoorsuarnut atatillugu naalakkersuinikkut tuaviupiluttumik aalajangersaaniarneq Partii Inuit inuiaqatigiinnut peqqinnartuungitsutut oqimaaqatigiinnermillu innarliisinnaasutut nalilerpaat. Kikkut tamat oqartussaaqataanera tunngavigalugu suliarineqartariaqarpoq, inuillu sumiiffimminni oqartussaaqataanerat qitiusariaqarluni, qulaaniit aalajangersaajuarnermiit salliutillugu, Nikku Olsen erseqqissaavoq.

Partiip qinigassanngortitai tassaapput:

Avannaanit:

Villads Korniliussen, Qaarsut

Markus E. Olsen, Ilulissat

Kasper Wille, Ilulissat

Qeqqanit:

Ulrik Maki Lyberth, Sisimiut

Sermersuumit:

Hans Jonathansen, Tasiilaq

Ane Petersen, Tasiilaq

Lars Mikaelsen, Kulusuk

Nikku Olsen, Nuuk