Partii atertaartoq: Nutarterinissaq piffissanngorpoq
Partii Naleqqap aqqi naalillugu Naleranngortippaa nutaamillu ilisarnaateqalerluni.
Naleraq tusagassiuutinut taama nalunaarpoq.
AAMMA ATUARUK Ilimasaarut: Apriilip ulluisa arfernanni qinersinerit marluussapput
Partii Naleqqap nutarterisussanngornini peqqutigalugu aqqi naaligini, Naleraq allappoq.
- Aniguisitaanermik suliniutivut inuiaqatigiinnit pilliutigineqassanngillat. Pikkorinnerusariaqarpugut tamanna ersarinnerpaamik nassuiassallugu. Tamannarpiaq pillugu partii nutartertussanngorpoq, tamannalu nuna tamakkerlugu ataatsimeersuarnissami anguniakkanik eqqartuinermi annertuumik aalajangersaavigineqassasoq naatsorsuutigaarput, Naleqqap siulittaasua Hans Enoksen allappoq nangillunilu:
- Covid-19 patsisaalluni ajoraluartumik nuna tamakkerlugu ataatsimeersuanngitsoorpugut, tamannalu pissutigerpiarlugu pisortatigoortumik aalajangiinissarput 2020-imi nuutsitaavoq. Tamanna uniffiginagu parteerput nutaamik eqqarsartussaavoq piviusorlu nutaaq ilassilluarlugu.
Nunamiit immamut
Ilisarnaat nutaaq sungaartumik aappaluaartumik qaqortumillu suli qalipaateqarlunilu seqinermik nuilersumik suli tunuliaquteqarpoq.
Ilisarnaammilu inussuttut isikkulik angalasut naleraattut isikkulimmik taarserneqarpoq.
- Ilisarnaatikutsinni inussuttut isikkulik angalasut naleraattut isikkulimmik taarserpoq. Ullutsinni tamatta sinerissap qanittuani najugaqarpugut, tassanilu inuullutalu immap qanittuani sulivugut, tusagassiuutinut nalunaarpoq.
Partii taanna atertaaginnarani nutaamillu
ilisarnaateqaliinnarani, aqqata naalisarnera PN-iujunnaarluni N-inngorpoq.
Aqqanik allannguineq Naleqqap tulliani ataatsimeersuarnerani pisortatigoortumik akuerineqassaaq.
