Partii Atassut tunuartertutut pissuseqalerpoq

Great Greenlandimut tunngatillugu maanna partii Atassut tunuartertutut isikkoqalerpoq.

Ippassaq unnukkut radioavisimi Aningaasaqarnermut Ataatsimiititaliami siulittaasoq, Ellen Christoffersen, ima oqarpoq:

- Pisortat suliffiutaasa tungaanninngaanniit taamatut unioqqutitsineq annertugisoq, isumaqarpunga mianernartuusoq aamma taamaattumik isornartorsiorneqartariaqarluni taamaattumik misissuisoqarnissaa kissaatigisimavarput. Minnerunngitsumillu aamma piffissap ingerlanerani Great Greenlandip ingerlatsineranut tunngassuteqartunik ilisimasallit akornanninngaanniit paasissutissat assigiinngitsut takkussuussimapput puisit amiinik eqqaasarnerit taavalu aamma Kalaallit Nunaanni puisit amiinik Canadamiullu puisit amiutaannik paarlaassuisarsimanerit, Ellen Christoffersen oqarpoq.

Taamatulli oqaaseqarneq ilumuunngilaq. Ellen Christoffersen ullumi tusagassiutinut nalunaaruteqarpoq, ippassaq oqaaseqaatini naqqinniarlugit.

Ellen Christoffersen allappoq ippassaq apersorneqarnermini paasissutissiissutit pineqartut Inatsisartut Aningaasaqarnermut Ataatsimiititaliap ataatsimiittarnerani oqaluuserineqartarsimanngitsut. Namminerlu inuttut inatsisartunilu ilaasortatut paasissutissat oqaluttuarfigineqarnermigut tusarsimagini.

Aningaasaqarnermut Ataatsimiititaliami ilaasortanit piumaffigineqarnermi kingunerisaanik oqaaseqaatiminik erseqqissaassuteqarpoq.

IA-p Aningaasaqarnermut Ataatsimiititaliaani ilaasortaatitaa, Johan Lund Olsen, oqarpoq Ellen Christoffersenip oqaaseqaamminik erseqqissaanera nammineq naammagisimaarallarlugu.

Siumup Ataatsimiititaliami ilaasortaatitaata, Tommy Marøp, aamma erseqqissaassuteqarneq iluarisimaanerarpaa iliuuseqaqqittoqartariaqanngitsorlu oqaatigalugu.