Parnaarussiviup erinarsoqatigiiivi nunatsinni tusarnaartitsissapput

Danmarkimi Vridsløselillep parnaarussiviani parnaarussat erinarsoqatigiivi 2004-mi CD-mik nuusiormata tusaamasannguutigaat, tassalu maajimi nunatsinni tusarnaartitsisussanngorlutik.
Allattoq Knud Reimer
marsip 23-at 2012 10:17

Nuummi Sisimiunilu pineqaatissinneqarsimasunut inissiivimmiut erinarsoqatigiiliornissannut parnaarussat erinarsoqatigiivi pilersitseqataanissaat pilersaarutaavoq, tassalu pineqaatissinneqarsimasunut inissiivimmiut sungiusaqatigineqareerpata tusarnaartitseqatigineqassapput.

Nuummi marloriarlutik, tassa kultoorikkut illorsuarmi Katuami Hans Egedellu oqaluffiani tusarnaartitsisoqarumaarluni. Katuami tusarnaartitsisoqarpat Nordisk Koncertkor peqataajumaarpoq.

Sisimiut kultoorikkut illorsuaq Taseralimmi tusarnaartitsisoqarumaarpoq, tassa Sisimiuni pineqaatissinneqarsimasut inissiivimiittut parnaarussallu ataatsimoorlutik tusarnaartitsiumaarmata.

Parnaarussat erianarsoqatigiivi ukiut ingerlanerini 280-iarlutik Danmarkimi tusarnaartitsiartortarsimapput, erinnallu parnaarussat namminneq erinniaat atorneqartarlutik. Tassa parnaarussatut inuuneq, imminut pisuutinneq, ugguarneq isumakkeerinninnerlu erinarsuutigineqartarlutik.

Parnaarussat erinarsortartui ukiuni quliniit qummut sivisutigisumik parnaarussaasussaapput, ilaalu parnaarussivimmiit anereeraluarlutik erinarsoqataajuaannarsimasuullutik.

Erinarsoqatigiit Danmarkimi suliniut "Exit - fra indsat til værdsat" kalaallisut Anineq - parnaarussaaqqanermiit nuannarineqalerneq-mik nutsersinnaasarput aallarnersaaffigeqataaffigisimavaat, tassalu parnaarussat inuiaqatigiinnut akulerutsinniarnerinut tassani ikiorneqartarlutik.

Parnaarussat erinarsoqatigiivini aqutsisoq tassaavoq Louise Adrian, ukiunilu 17-ni suliarujussuani arlaleriarluni nersornaatisissutigisimallugu. Ilaatigut erinarsoqatigiit pillugit piviusunik aallaavilimmik filmiliaq saqqummersinneqalermat nersornaat Kafkatten, inatsisinik atuutsitsinissamut peqatigiiffiup nersornaasiaa pissarsiarisimallutikku.

Aamma parnaarussat erinarsoqatigiivi pillugit atuakkiaq Kristeligt Dagbladip atuakkianik saqqummersitsiviata qanittukkut saqqummersikkumaarpaa.

Parnaarussat maani tusarnaartitsinissaat aningaasaateqarfiit arlallit aningaasaleeqataaffigaat. Nunatsinnilu suliffeqarfiit, soorlu Umiartortut angerlarsimaffii Nuummiittut Sisimiuniittullu, Kalaallit Nunaanni Brugsenit, Air Greenland, Katuaq kiisalu Arctic Umiaq Line aningaasaleeqataasimallutittaaq.