Parnaarussat naalliutsitaasarsimaqaat
al-Qaedamut ilaasortaasorineqartut naalagaaffeqatigiit nunani assigiinngitsuni parnaarussiviinut toqqorsimaqisunukaanneqartarsimapput, taakkulu naalliutsinneqartarsimapput, soorlu unatarneqarlutik, ipisimasuusaartinneqarlutik kanngunarsarneqartarlutillu, nalunaarusiami ilaatigut allassimavoq.
Paasissutissat al-Qaedamut ilaasortaasorineqartut nassuiaataanneersuupput, imaluunniit nalunaajaataanneersuupput. Dansk Røde Korsimili qullersaq, Anders Ladekarl, isumaqarpoq, paasissutissat eqqortuusut.
- Paasissutissat Røde Korsimit misissoqqissaarneqarnikuupput, tassa parnaarussat 14-it oqaloqatigineqarsimallutik. Taakku avissaaqqalluinnaramik imminnut oqaloqatigiinnissaminnut periarfissaqarsimanngillat, oqaluttuaallu assigiittorujussuupput, Anders Ladekarl oqarpoq.
Parnaarussat pineqarsimanerat inuiaat inuit inatsitigut illersugaanerannik pingaartitsisunut kanngunarsaataavoq. Isumaqarporlu danskit politikerii Amerikami oqartussaasunit sianiinaarneqarsimasut.
- Danskit politikerii USA-mit ilisimatinneqartarsimapput isertortunik parnaarussiveqanngitsoq. Maannali paasinarsivoq Polenimi Rumæniamilu taamaattunik parnaarussiveqarsimasoq, Geneve-milu isumaqatigiissut malinneqarsimanngitsoq. Tamanna Røde Korsimi qullersap iluatsitsinerliornertut taavaa.
