Parnaarussat kigaappallaamik sullinneqartarnerat pitsanngorsaavigineqassaaq

Sivisussusileriigaanngitsumik inissinneqarsimasunut kigaappallaamik sullissisoqarnera inissinneqarsimasunit ikiortaasartunit isornartorsiorneqartoq eqqartuussisup Thomas Trier Hansenip paasilluarpaa:

- Ajornartorsiuteqarpugut, tamanna nassuerutigisariaqarparput, aaqqiissoqartariaqarporlu, Nunatta eqqartuussiviani eqqartuussisoq Thomas Trier Hansen oqarpoq.

Danmarkimi inissiisoqartarnera isornartorsiorneqarpoq, sullissinerlu kigaappallaarnerarneqarluni. Eqqartuunneqarnissamut ulluliineq ajornakusoorsinnaasarpoq, qaammatillu arlallit ilaatigut utaqqisoqartariaqartarluni. Ikiortaasartut suliaq pillugu Nunatta eqqartuussivianut saaffiginnikkaangamik ilaatigut akissuteqarfigineqarneq ajorput:

- Eqqartuussinissamut ulluliisarnerit ilaatigut ajornakusoorsinnaasarput, eqqartuussaasimasup pineqaatissinneqarnerata naliliiffigeqqinneqarsinnaanissaa ajornakusoorsinnaasarluni, Thomas Trier Hansen oqarpoq.

Iliuuseqartoqalersaarnera taassuma aamma ilisimatitsissutigaa:

- Pisariaqassappat pineqaatissinneqarnerup qaammatikkaartumik nalilersoqqinneqartarnissaa pilersaarutigaarput. Tamanna maanna aallartinniarparput, suliap tunniunneqarneraniit qaammatit pingasut ingerlannginnerini eqqartuussisoqarsimanissaa aamma sulissutiginiarparput, Thomas Trier Hansen oqarpoq.

Nunattali eqqartuussiviani sullissineq sooruna taama killeqartigisoq?

- Aalajangersimasunik kredsdommereqarnissaq Kalaallit Nunaanni sivisuumik atugaasimanngilaq, taamaammat eqqartuussinissamik ulluliinissat assigisaallu pisariunerusarsimapput, eqqartuussiveqarnerulli aaqqissuuteqqinneratigut ajornartorsiutit aaqqiivigineqarnissaat neriuutigaarput, Thomas Trier Hansen oqarpoq.