Parnaarussanut pulaartartut pitsaanerusumik sullinneqartariaqarput

Pinerluttulerinermi inatsit naapertorlugu pineqaatissinneqarnikut pulaartartoqartussaapput, nunatsinni Danmarkimiluunniit parnaarussaassagaluarpata.

Pulaartartut suliassaasa ilagaat parnaarussat sivisuallaamik parnaarussaasimannginnissaat qulakkeertussaallugu.

Pulaartartulli suliassaat oqartussaasunit ajornakusoortinneqartoq, pulaartartut ilaat oqarpoq:

- Retsudskriftinik, tassa tusaatissanik tunineqartarnissarput kissaatiginarpoq. Kikkunngooq maani parnaarussaasut nunaqqatitsinnut aamma eqqartorsigit. Oqaloqatigisartigullu. Maani matoqqavallaaqigami. Illersuisut nunatsinnilu oqartussat akornanni ungasippallaaqaaq, parnaarussanik pulaartartoq Bodil Johansen, 62-inik ukiulik oqarpoq.

Taanna Herstedvesterimi parnaarussanut marlunnut pulaartartuuvoq.

Parnaarussat pillugit suliap ukioq allortarlugu suliarineqartarnissaa qulakkeertussaavaa, ajornartorsiulli tassaavoq parnaarussaq pillugu suliaq ingerlateqqinneqaleraangat pulaartartut kingusippallaamik paasitinneqartarmata.

Tamanna pillugu parnaarussat ikiorniassallugit ajornakusoorsinnaasarpoq, Bodil Johansen oqarpoq.

Bodil Johansen 1996-imili parnaarussanik pulaartartuuvoq. Taamanikkut tusartarsimagaluarpaa Herstedvesterimi parnaarussat ulorianartorsuusut, allarujussuarmilli naapitaqarpoq:

- Ileqqui, pissusaat, nukappiararujussuartut ipput, inersimasunngorsimanngitsut. Meeraallutilli qimatat, Bodil Johansen oqarpoq.

Eqqartuussinerit najuuffiginissaasa saniatigut, pulaartartoq tassaavoq ilaquttatut ikinngutitullu isigisassaq.

Herstedvesterimi parnaarussat qaammammut ataasiarlutik anisinnaatitaapput paarsisulerlutik, taamaalinikkullu Bodil Johansenip parnaarussaq paarsisorlu Amagerimi angerlarsimaffimminut neriartoqqusarpai, kingornalu aneeqatigisarlugit, pisuttuaqatigisarlugillu.

Bodil Johansenip pulaartartuunini nuannaralugu ingerlatikkusuunnarallarpaa, qaqugulu uninnissani ilisimanagu:

- Utoqqavassaaranngornikuugama apeqqutaavoq ukiut qassit sulisinnaatitaassanersunga. Naalagaasarput maani sulitillugu sulinnarusuppunga, tassa Henriette Kjær maani sulitillugu ikiutaasaqimmat suliaannassaanga, Herstedvesterimi kalaallit parnaarussanut pulaartartuisa ilaat Bodil Johansen Qaqortuminngaanneersoq oqarpoq.